[A:527]རྩ་ལྔར་གྲལ་དཔོན་མཛད་དེ་འཁོར་ཐམས་ཅད་སྐྱོང་ཞིང་བཞུགས་པ་ཡིན་ནོ། །རྗེ་བཙུན་གཙང་པ་ནི། ལས་སྟོད་ཅུང་པའི་སྨད་ཀྱི་སུམ་པ་ཉེའུ་མཁར་ཞེས་བྱ་བ་ན། ཡབ་སུམ་པ་དབང་ཕྱུག་ཅེས་བྱ་བ་དང༌། ཡུམ་རྨ་མོ་ཁྱེ་མཁར་ཞེས་བྱ་བའི་སྲས་ལྔའི་ཆེ་དག་ཏུ་འཁྲུངས། ཁྱིམ་ཐབ་བྱེད་ཁར་གཡུ་རྡོག་ཁྱེར་ནས་མྱང་སྟོད་སྟག་ཚལ་དུ་སྟོད་ལུང་པ་རྒྱ་དམར་བ་དང༌། རོག་མངོན་པ་གཉིས་ཀྱི་གྲྭ་སར་བྱོན་ནས་རབ་ཏུ་བྱུང་སྟེ་ལོ་གཅིག་བཞུགས། དེ་ནས་རྗེ་རས་ཆུང་བའི་སྤྱན་སྔར་བྱོན་པས་ཤིན་ཏུ་མོས་པར་གྱུར་ནས། ཕྱག་གཡས་པའི་སྲིན་ལག་བཅད་དེ་མར་མེ་བྱས་ནས་ཕུལ། དགུང་ལོ་ཉི་ཤུ་རྩ་གཅིག་གཉིས་ལ་མཇལ་ནས་གཟིམས་གཡོག་མཛད་དེ། ཞལ་མཇལ་ཚད་ལ་མཐོང་ཕྱག་གསུམ་གསུམ་མཛད་པ་དང༌། ཞག་རེ་ལ་ཕྱག་བརྒྱ་བརྒྱ་མཛད་པར་དམ་བཅས་ཏེ་བཞུགས། དང་པོ་ནས་ཡབ་ཡུམ་གཉིས་རྗེ་བཙུན་གྱི་ཡོན་བདག་ཏུ་གྱུར་པ་དང༌། ཐག་རིངས་སུ་ཆོས་ལ་བྱོན་པས། ཁོང་གིས་ཉེ་གནས་མཛད་ཕན་ཆད་ཁོང་མེད་པའི་ཆོས་དང་གདམས་ངག་ཐུན་ཅིག་ཀྱང་གསུངས་པ་མེད་སྐད། རས་ཆུང་པ་གཤེགས་རྗེས་གདན་ས་གཟུང༌། དེའི་དུས་ན་ཆུ་བོ་གངྒཱ་ཚུན་ལ་བཟང་བར་གྲགས། གདམས་ངག་ནི་རྒྱ་བོད་གཉིས་ཀ་ན་ཆེ། ཐུགས་རྗེས་ནི་སེམས་ཅན་ཐམས་ཅད་རྗེས་སུ་འཛིན་པ་ཞིག་བཞུགས། ཡང་སྡེ་སྣོད་འཛིན་པ་ནས་མ་དེ་བུད་མེད་དང་བྱིས་པ་ཡན་ཆོད་མི་དད་པ་དང་སྐུར་བ་འདེབས་པ་ནི་གཅིག་ཀྱང་མེད། ཁོང་གི་མཛད་སྤྱོད་སྣ་རེ་མཐོང་བས་སེམས་ལ་ཕན་ཞིང༌། སློབ་དཔོན་གཞན་ལ་ཆོས་དང་