[A:572]ནས་ཀམ་པོ་གནས་ནང་ན་དུས་གསུམ་མཁྱེན་པ་བཞུགས་པ་ཐོས་ནས། ཞལ་བལྟ་བ་དང་བྱིན་རླབས་ཞུ་བ་ཙམ་བྱ། ཆོས་ཞུ་རྒྱུ་ནི་མེད་བསམ་ནས་བྱོན་པའི་ཚེ། དགེ་བསྙེན་རྡོ་རྗེ་དཔལ་རྩེགས་ཀྱིས་བསུ་བ་བྱས། དུས་གསུམ་མཁྱེན་པ་དང་མཇལ། དེའི་ཚེ་དུས་གསུམ་མཁྱེན་པའི་ཞལ་ནས། ཁྱོད་སྔགས་ཆུང་ཤེས་རབ་ཅན་ཅིག་འདུག་པས་ངའི་སློབ་མ་བྱས་ན་འོང་གསུང༌། ཁྱེད་ལ་སློབ་མ་ཅི་འདྲ་ཡོད་ཞུས་པས། འབའ་ཚ་སྟག་ངེལ་བ་དང༌། འདེ་ཆུང་སངས་རྒྱས་ལ་སོགས་པ་ཡོད། ཁྱོད་རང་དེའི་རྩར་སོང་གསུང་བས། འདེ་ཆུང་སངས་རྒྱས་ཀྱི་སར་ཕྱིན་པས། ཁྱོད་སྔགས་ཆུང་ཤེས་རབ་ཅན་ཅིག་འདུག་པས་ངའི་བླ་མའི་སློབ་མ་བྱས་ན་འོང་གསུང་ཞིང༌། ད་འབལ་ཚ་སྟག་ངེལ་བའི་སར་སོང་གསུང༌། བྱོན་པས་ཕུག་པ་ཅིག་ན་སྟག་ཆེན་པོ་ཅིག་འདུག་པས་སྐྲག་སྟེ་བྲོས་བྱོན་པས། ཡང་སོང་དང་ཟེར་ནས་ཕྱིན་པས། མཚོ་ཅིག་འདུག་པ་ལ་བསྐོར་ཞིང་རྡེའུ་འགའ་ཡར་སྐྱུར་ནས་བྱོན། ཡང་ད་དུང་སོང་དང་ཟེར་ནས་ཕྱིན་པས། སྒོམ་ཆེན་ཅིག་འདུག་པ་དེའི་པང་ན་སྔར་སྐྱུར་བའི་རྡེའུ་རྣམས་འདུག དེ་ན་རེ།
ཡང་ཁྱོད་སྔགས་ཆུང་ཤེས་རབ་ཅན་ཅིག་འདུག་པས་ངའི་བླ་མའི་སློབ་མ་བྱས་ན་འོང་བ་ལ་གསུང་པས། སློབ་མའི་ཡོན་ཏན་ཡང་འདི་འདྲ་ན་བསམ་ནས། སླར་དུས་གསུམ་མཁྱེན་པའི་དྲུང་དུ་བྱོན་ནས་གདམས་པ་རྣམས་གསན་ཏེ། ལོ་བདུན་དུ་དབུ་སྔས་ལ་མི་འཇོག་པའི་དམ་བཅའ་མཛད། གདམས་པའི་ཕུ་ཐག་ཆོད། ཆོས་རྗེ་རིན་པོ་ཆེའི་ཞལ་ནས། དབུས་བརྙེད་པ་ཚོལ་བ་ཅིག་