[A:571]དེར་ངའི་གདམས་ངག་མ་རྫོགས་པར་ཆོས་རྗེ་སྐུ་འདའ་བར་འདུག་བྱས་ནས་བཤུམས་པས། ད་རྒྱ་སྒོམ་ལ་གཏུགས། ཇི་ལྟར་བྱས་ཀྱང་བདེ་བར་འོང་གིས་གསུང༌། དེ་ནས་ཕག་མོ་གྲུ་པ་དང་མཇལ་ཞིང་ཆོས་ཞུས། དེ་ནས་དོལ་དུ་འཚུར་དབང་ངེ་ལ་གསར་རྙིང་གི་གདམས་པ་མང་དུ་ཞུས །རྡོ་རྒྱུས་བྲག་ལ་བསྒོམས་པས་རྗེ་བཙུན་མ་ཞལ་གཉིས་མའི་ཞལ་གཟིགས། ཐུགསས་གཏད་པ་ཙམ་གྱིས་ནད་གདོན་ཞི་བ་ཡང་བྱུང༌། དེ་ནས་གཉལ་དུ་གཙང་སྟོན་དཀོན་ནེ་ཡབ་སྲས་ལ་ཆོས་མང་གསན། དེའི་ཚེ་སུ་ཁ་སིདྡྷི་ཞལ་གཟིགས། ཟ་ཆུ་འདུས་སུ་སྒམ་པོ་བའི་སློབ་མ་དང་མ་ཤེས་རབ་བྱས་བ་འོད་གསལ་རྒྱུན་ཆད་མེད་པ་ཅིག་བཞུགས་པ་ལ་དབང་དང་གདམས་པ་མང་དུ་ཞུས། གཉལ་གྱི་གྲོག་ཕུགས་ཤེད་དུ་བསྒོམས་པས་སྤྱན་དང་མངོན་པར་ཤེས་པ་ཤར། དེ་ནས་ཡར་ཀླུངས་སུ་བྱོན་ནས་རྗེ་སྒོམ་ཞིག་པོ་ལ་བི་མ་ལའི་གདམས་པ་མ་ལུས་པ་ཞུས། དེར་ཡུལ་གྱིས་ཐུགས་དམ་ལ་གནོད་པར་དགོངས་ནས། གཡེར་ཐོད་པ་བསམ་གྲུབ་ལ་ཇོ་མོའི་གདམས་པ་གཅོད་རྣམས་ཞུས། དེ་ནས་ཀོང་པོར་བྱོན་བླ་མ་མངའ་རིས་པ་དང་མཇལ། གདམས་པ་མང་དུ་གསན། སྤོ་བོར་གཉལ་པ་ཇོ་སྲས་ལ་ཕག་མོ། ཆོས་དྲུག་ལ་སོགས་པ་དང༌། ཁྱད་པར་མགོན་པོ་བེར་ནག་ཅན་ཞུས་ཤིང་ཞལ་ཡང་གཟིགས། ཡར་ཀླུངས་ནས་ཡུམ་གྱིས་རོ་ཟན་ནག་པོ་བྱ་བ་ཞིག་འབོད་དུ་བཏང་བྱུང་བ་ལ་མ་བྱོན་པར། ཚ་བ་སྒང་དང་དམར་ཁམས་སུ་བྱོན་པས་དེ་རྣམས་སུ་་སྐུ་བསོད་སྐྱེས། སྔགས་གྲྭ་བཙུགས་ནས་འཁྲུག་གདུམས་མང་དུ་མཛད། དེ་