[A:573]ལ་ཁྱོད་དང་སློབ་དཔོན་བཀའ་གདམས་པ་གཉིས་རྙེད་པ་ཆེ་གསུང་བ་བཞིན་དུ། གཅིག་པུར་བཞུགས་དབང་མེད་པར་ཕྲིན་ལས་ཀྱི་མཐའ་རྒྱས་པར་གྱུར། སློབ་དཔོན་བཀའ་གདམས་པའི་དྲུང་དུ་ཡང་ལོ་གསུམ་བསྒོམས། སྔར་དུས་གསུམ་མཁྱེན་པའི་ཡང་རབ་ཏུ་འབྱུང་བར་འོས་པའི་བཀའ་ཡོད་པ་དང༌། སློབ་དཔོན་བཀའ་གདམས་པས་བསྐུལ་བ་ལ་བརྟེན་ནས། ལོ་སོ་བདུན་པ་ལ་མཁན་པོ་མ་དྲེལ་བ་དང་སློབ་དཔོན་བཀའ་གདམས་པ་ལ་ཆིག་རྫོགས་མཛད། མཚན་བསོད་ནམས་གྲགས་པར་བཏགས། དེ་ནས་ཀར་མ་རིན་པོ་ཆེ་དང་མཇལ་ནས་ལོ་གསུམ་བཞུགས། དུས་གསུམ་མཁྱེན་པ་དབུས་སུ་བཞུད་པ་ལ་ཏྲེ་ཤོད་རྣ་རྒྱང་བར་དུ་སྐྱེལ་ཐུང་མཛད། དེ་ནས་དམར་ཁམས་སུ་བྱོན་ནས་འགྲོ་དོན་རྒྱ་ཆེན་པོ་མཛད་པའི་སྐབས་ཞིག་ཏུ་ཆོས་རྗེ་དུས་གསུམ་མཁྱེན་པ་སྐུ་གཤེགས་པ་ཡང་མཁྱེན། ཕྱིས་གདན་སའི་ཞབས་ཏོག་ཀྱང་ཆེར་མཛད། བླ་མ་དང་གྲུབ་ཐོབ་དང་ཡི་དམ་གྱི་ཞལ་གཟིགས་པ་རྣམས་ནི་བརྗོད་ཀྱིས་མི་ལང༌། འགྲོ་དོན་ཕུན་སུམ་ཚོགས་པའི་མཐར་དགུང་ལོ་བདུན་ཅུ་བཞེས་པ་དབྱར་ཟླ་ར་བའི་ཉི་ཤུ་ལྔ་ལ་ཞིང་དག་པར་གཤེགས། དེའི་རྗེས་སུ་ཡང་སློབ་མ་རྣམས་ལ་སྐུའི་བཀོད་པ་སྣ་ཚོགས་སུ་བསྟན་ཏོ། །གདུང་སྦྱངས་པས་ལྷ་སྐུ་དང་རིང་བསྲེལ་ཡང་མང་དུ་བྱོན་ནོ། །
དེའི་སློབ་མ་ནི་ཆོས་རྗེ་སྦོམ་བྲག་པ་ཡིན་ཏེ། དེ་ནི་སྐྱེ་བ་སྔ་མ་ལ་བྱ་རྒོད་ཕུང་པོའི་རི་དང་རྡོ་རྗེ་གདན་གྱི་བར་དུ་ས་ཐོབ་པའི་བྱང་ཆུབ་སེམས་དཔའ་ཡེ་ཤེས་བློ་གྲོས་བྱ་བར་སྐྱེ་བ་བཞེས། དེ་ནས་འདིར་འབྲི་རྒྱལ་དམ་