[A:551]ཕྱིས་དགེ་སློང་ནམ་མཁའ་འོད་དུ་གྱུར་ནས་སྐྱེ་བ་རྒྱུན་མི་འཆད་དུ་བྱུང་བ་ཡིན་ཏེ། དེ་ནི་ཕྱིས་སླར་ཡང་རྗེ་སྒམ་པོ་བའི་སློབ་མར་གྱུར་ཏེ། དེའི་ཚུལ་ནི་ཕྱི་ནས་བརྗོད་པར་བྱའོ། །རྗེ་དྭགས་པོ་རིན་པོ་ཆེ་དེའི་དབོན་པོ་སློབ་དཔོན་སྒོམ་པར་མཚན་གསོལ་བ་དེ་ནི། རྗེ་སྒམ་པོ་བའི་གཅེན་པོ་རྒྱ་བ་སེ་རེ་དང༌། ཡུམ་ཚེ་ལྕམ་གཉིས་ལ་སློབ་དཔོན་སྒོམ་པ། སྒོམ་པ་གྲགས་མཛེས། སྒོམ་ཆུང་སྟེ་སྲས་གསུམ་བྱུང་བ་ལས། བར་བ་གྲགས་མཛེས་ནི་ཏིང་ངེ་འཛིན་གྱི་ཡོན་ཏན་དུ་མ་དང་ལྡན་པ་ཞིག་བྱུང་སྟེ། སྔ་མོ་ནས་གཤེགས། ཆེ་བ་སློབ་དཔོན་སྒོམ་པ་ཡུམ་ལ་རྨི་ལྟས་ཁྱད་པར་ཅན་དང་བཅས་ཏེ་མེ་ཕོ་སྤྲེའུའི་ལོ་ལ་གཉལ་བོང་སྙིར་འཁྲུངས། ལོ་བཅུ་གཅིག་ལོན་པའི་ཚེ་རྗེ་སྒམ་པོ་བ་དང་མཇལ། རྗེ་སྒམ་པོ་བའི་ཞལ་ནས། འདི་རྒྱ་གར་གྱི་པནྚི་ཏ་ཆེན་པོ་ཞིག་ཡིན་གསུང༌། ཞལ་མཇལ་བ་ཙམ་གྱིས་སྒྱུ་མ་ལྟ་བུའི་ཏིང་ངེ་འཛིན་འཁྲུངས། བཅུ་བདུན་པ་ལ་དགེ་བཤེས་མངའ་རིས་པ་ལ་རབ་ཏུ་བྱུང༌། ལོ་དེ་ཉིད་ལ་རྗེ་སྒམ་པོ་བས་སིན་དྷཱུ་རའི་དཀྱིལ་འཁོར་དུ་དབང་བསྐུར་ནས། བསྐྱེད་རྫོགས་ཀྱི་གདམས་པ་ལེགས་པར་གནང་བ་བསྒོམས་པས། ལོ་བཅོ་བརྒྱད་པ་ལ་ཕྱག་རྒྱ་ཆེན་པོ་སྒོམ་དུ་མེད་པའི་རྟོགས་པ་འཁྲུངས། ཐབས་ལམ་ལ་ཡང་མངའ་བརྙེས་ཏེ། ལོ་ཉི་ཤུ་བཞེས་པའི་ཚེ་གཉགས་ལྷ་བྱར་མའི་གངས་ལ་བཞུགས་པའི་ཚེ། གངས་རྩེར་བཞུགས་ཀྱང་ཐེར་ཆམ་རེས་དྲོས་པ་དང༌། འབྱུང་བཞིའི་རླུང་གི་ཁ་དོག་གསལ་པོར་གཟིགས་ཤིང༌། སྟེང་འོག་སྤོབ་དང་གཡས་གཡོན་སྤོབ་ལ་ཚེགས་མེད་པ་