[A:551]phyis dge slong nam mkha' 'od du gyur nas skye ba rgyun mi 'chad du byung ba yin te/ de ni phyis slar yang rje sgam po ba'i slob mar gyur te/ de'i tshul ni phyi nas brjod par bya'o/ /rje dwags po rin po che de'i dbon po slob dpon sgom par mtshan gsol ba de ni/ rje sgam po ba'i gcen po rgya ba se re dang / yum tshe lcam gnyis la slob dpon sgom pa/ sgom pa grags mdzes/ sgom chung ste sras gsum byung ba las/ bar ba grags mdzes ni ting nge 'dzin gyi yon tan du ma dang ldan pa zhig byung ste/ snga mo nas gshegs/ che ba slob dpon sgom pa yum la rmi ltas khyad par can dang bcas te me pho spre'u'i lo la gnyal bong snyir 'khrungs/ lo bcu gcig lon pa'i tshe rje sgam po ba dang mjal/ rje sgam po ba'i zhal nas/ 'di rgya gar gyi panTi ta chen po zhig yin gsung / zhal mjal ba tsam gyis sgyu ma lta bu'i ting nge 'dzin 'khrungs/ bcu bdun pa la dge bshes mnga' ris pa la rab tu byung / lo de nyid la rje sgam po bas sin dhU ra'i dkyil 'khor du dbang bskur nas/ bskyed rdzogs kyi gdams pa legs par gnang ba bsgoms pas/ lo bco brgyad pa la phyag rgya chen po sgom du med pa'i rtogs pa 'khrungs/ thabs lam la yang mnga' brnyes te/ lo nyi shu bzhes pa'i tshe gnyags lha byar ma'i gangs la bzhugs pa'i tshe/ gangs rtser bzhugs kyang ther cham res dros pa dang / 'byung bzhi'i rlung gi kha dog gsal por gzigs shing / steng 'og spob dang g.yas g.yon spob la tshegs med pa