[A:550]འདུ་བ་དང༌། མི་མ་ཡིན་རྣམས་འདུ་བ་དང༌། ལུང་པ་འཇའ་འོད་ཀྱིས་གང་བ་ལ་སོགས་པའི་ལྟས་སྣང་ཡང་བསམ་གྱིས་མི་ཁྱབ་པ་བྱུང༌། སྡེ་བ་རྣམས་སོ་སོ་ནས་གདུང་སྐལ་སྙེག་ཏུ་བྱུང་བ་ལ། སློབ་དཔོན་སྒོམ་ཚུལ་གྱིས་གདུང་ཞོལ་གཞལ་ནས་བྱིན་པས་ཐམས་ཅད་བསམ་པ་ཚིམ་པར་གྱུར་ཏོ། །གསུང་ལས་སྐྱེས་པའི་བུ་ཆེན་ཡང་ཤོ་རོམ་འཕགས་པ། ཟིམ་ཤིང་ཡེ་ཤེས་སྙིང་པོ། གསེར་སྒོམ་ཡེ་ཤེས་སྙིང་པོ། རམ་ཉི་བ་ཆོས་ཀྱི་གཡུང་དྲུང་སྟེ་གྲུབ་པ་ཐོབ་པ་བཞི། དྭགས་པོ་སྒོམ་ཚུལ། ཕག་མོ་གྲུ་པ། འབའ་རོམ་པ། དུས་གསུམ་མཁྱེན་པ་སྟེ་བརྒྱུད་པ་འཛིན་པ་བཞི། དྭགས་པོ་འདུལ་འཛིན། འགར་སྒོམ་དཀར་པོ། ལ་ཡག་ཇོ་སྲས། སྐྱེ་བོ་ཡི་རྡོར་ཏེ་དེ་དང་ཉེ་བ་བཞི། ཇོ་སྟོན། ལེགས་མཛེས། གསལ་བྱང༌། གསལ་ཡེས་ཏེ་ཉེ་གནས་བཞི་སྟེ། དེ་དག་ལ་སྒམ་པོ་བའི་བུ་ཆེན་བཅུ་དྲུག་ཅེས་གྲགས། གཞན་ཡང་རྨོག་ཅོག་པ། ཁྱུང་ཚང་བ། གཉགས་ནག གཉགས་དམར་པོ། གསལ་ལྡོང་ཤོར་རེ། ཞང་སུམ་ཐོག་པ། བླ་མ་འོལ་ཁ་བ་གྲོལ་སྒོམ། ལྷོ་པ་དར་སྒོམ། རྫི་སྒོམ་སྐྱེས་སེ། བྱ་སྒོམ་རྡོ་རྗེ་སེངྒེ། འབྲོ་དམར་ཡུ། ནམ་པ་འཕན་ནེ། བཙད་པོ་ལྷ་སྒོམ། སློབ་དཔོན་སྒོམ་ཆུང་ལ་སོགས་པ་མང་དུ་བྱོན་ནོ། །དེ་ལ་ཁམས་པ་དབུས་སེ་ནས་གྲུབ་པའི་སྐྱེས་བུ་སྐྱེ་བ་རྒྱུན་མི་འཆད་པར་བྱུང་བ་བཞིན་དུ། རྗེ་སྒམ་པོ་བའི་སློབ་མ་དགེ་སློང་ཚུལ་ཁྲིམས་དཔལ་ཞེས་བྱ་བ་དབུ་སའི་ཡང་སློབ་མར་གྱུར་པ་ཞིག རང་ལོ་སུམ་ཅུ་རྩ་བདུན་པ་ལ་གཤེགས་ནས།