[A:486]དང་ཡང་མཇལ། རྣལ་འབྱོར་དང་རྣལ་འབྱོར་མ་གཞན་འགའ་རེ་ལ་ཡང་གདམས་པ་སྣ་ཚོགས་གསན་ཞིང༌། དད་པ་ཆེན་པོས་བཙལ་བས་ནམ་ཞིག་ནགས་གསེབ་ཅིག་ཏུ་མཇལ་ཏེ། གསེར་རྣམས་ཕུལ་བས་ཐམས་ཅད་གཏོར། ཅུང་ཞིག་ཡིད་མ་ཆེས་པ་ན་ཞབས་ཀྱི་མཐེ་བོང་ས་ལ་རེག་པས་ས་དེ་གསེར་དུ་སོང༌། ཞལ་ནས་ཀྱང༌། ཐམས་ཅད་གསེར་གླིང་ཡིན་ནོ་ཞེས་གསུངས། དེ་ནས་མི་སྣང་བར་གཤེགས། དེ་ལ་རྗེ་མར་པ་ནི་སྔ་གོང་ཉིད་ནས། རྗེ་ཏི་ལླི་པས། བྷོ་ཊའི་མ་རིག་མུན་སོལ་ལ། །ཡེ་ཤེས་སྣང་བས་ཁྱབ་པར་གྱིས། །ཞེས་ལུང་ཡང་བསྟན། བླ་མ་སྤྱོད་པ་ལ་གཤེགས་ནས་མཇལ་པའི་སྐབས་ཚུན་ཆད་དུ་ཐུགས་དམ་ཇི་ལྟར་འཁྲུངས་པ་ལ་སོགས་པའི་ཚུལ་ནི་བརྗོད་པ་ལས་འདས་སོ། །དེ་ནས་ལར་ཡང་བོད་དུ་བྱོན་ཏེ་བལ་པོར་ཕེབས་ནས་ཕམ་མཐིང་བ་ལ་སོགས་པའི་བླ་མ་རྣམས་ཀྱི་དྲུང་དུ་ནཱ་རོ་པའི་ཡོན་ཏན་དང་རང་ཉིད་ཀྱི་ངང་ཚུལ་རྣམས་གླུར་བླངས། བླ་མ་མཆེད་གྲོགས་དང་བཅས་པ་རྣམས་ཀྱང་དགྱེས་པར་མཛད། དེའི་ཚེ་ལོ་བཞི་བཅུ་རྩ་གཉིས་པ་ཡིན། དེ་ནས་བོད་དུ་ཕེབས་ཏེ་ཡུལ་ས་གཟུང༌། བདག་མེད་མ་ཡང་བཙུན་མོར་བླངས། གཞན་ཡང་བཙུན་མོ་མ་ཕྱག་རྒྱར་སྡོ་བ་བརྒྱད་ཙམ་ཞིག་ཡོད་པར་གྲགས་ཏེ། ཀྱེ་རྡོར་ལྷ་མོ་དགུ་པོ་དང་སྦྱོར་བ་ཡིན། ཡང་མཻ་ཏྲི་བའི་བསྔགས་པ་གསན་པས་ཐུགས་དྲངས་ཏེ་རྒྱ་གར་དུ་བྱོན་ནས། རྒྱ་གར་ཤར་ཕྱོགས་སུ་མངའ་བདག་མཻ་ཏྲི་བ་དང་མཇལ། རྒྱུད་ཀྱི་གསན་པ་མང་པོ་ཡང་མཛད། ཕྱག་རྒྱ་ཆེན་པོའི་མན་ངག་གིས་མངོན་སུམ་གྱི་རྟོགས་