[A:485]རྫོགས་པའི་རིམ་པའི་མན་ངག་རྣམས་ཀྱང་ལེགས་པར་གནང༌། གཞན་རྒྱ་གར་ནུབ་ཕྱོགས་ཏུ་ལ་ཀྵེ་ཏྲའི་གྲོང་དུ། བླ་མ་ཐར་པ་ལམ་སྟོན་ནམ་ཡེ་ཤེས་སྙིང་པོ་ལ་གསང་བ་འདུས་པ་རྒྱུད་རྐྱང་གི་ལུགས་རྣམས་ལེགས་པར་གསན། སླར་ནཱ་རོ་པའི་དྲུང་དུ་བྱོན་ནས་སྒྲོན་མ་གསལ་བའི་བཤད་པ་ལེགས་པར་གསན། མ་ཧཱ་མཱ་ཡཱ་ཡང་དབང་བྱིན་རླབས་མན་ངག་དང་བཅས་པ་རྫོགས་པར་གནང༌། དེ་ནས་སླར་བོད་དུ་བྱོན་ཏེ། བྱང་ཕྱོགས་སུ་ཕྱུག་པོ་འགའི་སྲིའུ་གསོ་བ། ལྷ་མོ་དུད་སོལ་མ་ལ་བརྟེན་ནས་མཛད་དེ། སྲིའུ་རེ་རེ་ལ་གསོས་པའི་ཡོན་སྲང་བཅུ་བཅུ་ཕབ། ནམ་རའི་གསེར་ཁ་རྡོལ་བ་དང་འཛོམ་པ་དང༌། ཙམ་ལུང་གི་མར་པ་མགོ་ཡགས་བྱ་བ་དེས་རུས་གཅིག་པའི་ཞེན་བྱས་ནས་དབང་ཞུས་ཤིང༌། ཉེ་འབངས་དང་བཅས་པ་ལ་གསེར་འབུལ་དུ་བཅུག་པས་ཕྱག་ཏུ་གསེར་མང་པོ་ཡང་དག་པ་བྱུང༌། དེ་ནས་མར་པ་མགོ་ཡགས་ཀྱིས་སྐྱི་རོང་གི་ལ་རྩ་ཚུན་བསྐྱལ། དེ་ནས་བལ་པོ་ནས་རྒྱ་གར་དུ་བྱོན། ཡུལ་དབུས་སུ་ཕེབས་པའི་ཚེ་ནཱ་རོ་པ་སྤྱོད་པ་ལ་གཤེགས་ཟིན་ནས་མཇལ་རྒྱུ་མ་བྱུང༌། སྤྱོད་པ་ལ་གཤེགས་ཁར་ནཱ་རོ་པས་སློབ་མ་རྣམས་ལ་རྟེན་ནས་སོ་སོར་གནང་ནས། མར་པའི་སྐལ་བ་ཡིན་ཟེར་བ་ཞིག་བཞག་ནས་སྣང༌། དེར་བླ་མ་གཞན་ལ་ཆོས་འདྲ་བ་གསན་ཞིང༌། དགྱེས་རྡོར་གྱི་རྒྱུད་ལ་གཟིགས་རྟོགས་མཛད་པ་ན། ནཱ་རོ་པ་ཚོལ་བའི་འདོད་པ་ཆེན་པོ་སྐྱེས་ཏེ། རྒྱ་གར་ཤར་ཕྱོགས་དང་ལྷོ་ཕྱོགས་རྣམས་ཀྱི་ཡུལ་དུ་མར་བགྲོད། དེའི་ཚེ་གསོ་རི་བ་ལ་སོགས་པའི་གྲུབ་ཐོབ་མང་པོ་