[A:486]dang yang mjal/ rnal 'byor dang rnal 'byor ma gzhan 'ga' re la yang gdams pa sna tshogs gsan zhing / dad pa chen pos btsal bas nam zhig nags gseb cig tu mjal te/ gser rnams phul bas thams cad gtor/ cung zhig yid ma ches pa na zhabs kyi mthe bong sa la reg pas sa de gser du song / zhal nas kyang / thams cad gser gling yin no zhes gsungs/ de nas mi snang bar gshegs/ de la rje mar pa ni snga gong nyid nas/ rje ti lli pas/ bho Ta'i ma rig mun sol la/ /ye shes snang bas khyab par gyis/ /zhes lung yang bstan/ bla ma spyod pa la gshegs nas mjal pa'i skabs tshun chad du thugs dam ji ltar 'khrungs pa la sogs pa'i tshul ni brjod pa las 'das so/ /de nas lar yang bod du byon te bal por phebs nas pham mthing ba la sogs pa'i bla ma rnams kyi drung du nA ro pa'i yon tan dang rang nyid kyi ngang tshul rnams glur blangs/ bla ma mched grogs dang bcas pa rnams kyang dgyes par mdzad/ de'i tshe lo bzhi bcu rtsa gnyis pa yin/ de nas bod du phebs te yul sa gzung / bdag med ma yang btsun mor blangs/ gzhan yang btsun mo ma phyag rgyar sdo ba brgyad tsam zhig yod par grags te/ kye rdor lha mo dgu po dang sbyor ba yin/ yang mai tri ba'i bsngags pa gsan pas thugs drangs te rgya gar du byon nas/ rgya gar shar phyogs su mnga' bdag mai tri ba dang mjal/ rgyud kyi gsan pa mang po yang mdzad/ phyag rgya chen po'i man ngag gis mngon sum gyi rtogs