[A:471]
ཕག་མོ་གཞུང་དྲུག་གི་སྐབས།
བདེ་མཆོག་གི་བཤད་པའི་རྒྱུད་རྣམས་ལ་བརྟེན་ནས་ཕག་མོ་ལྷ་སོ་བདུན་མ་ཞེས་བྱ་བ་ཡུམ་འབའ་ཞིག་གི་དཀྱིལ་འཁོར་དུ་སློབ་མ་དབང་བསྐུར་ཞིང༌། དཀྱིལ་འཁོར་དེ་ཉིད་ལ་བསྙེན་ཅིང་
སྒྲུབ་པའི་རིམ་པ་ཡང་མང་དུ་བྱུང་ངོ༌། །
བྱེ་བྲག་ཏུ་སྡོམ་པ་རྒྱ་མཚོའི་རྒྱུད་ལ་བརྟེན་ནས་ཕག་མོའི་གཞུང་དྲུག་ཏུ་གྲགས་པའི་བྱིན་རླབས། གཞུང་གི་བཤད་པ། ཉམས་ལེན་གྱི་རིམ་པ་རྣམས་གངས་ཅན་གྱི་ཁྲོད་འདིར་
སྔགས་ཀྱི་རྣལ་འབྱོར་པ་ཕལ་མོ་ཆེ་ལ་བྱུང་ངོ༌། །ལུགས་འདི་ཡང་ཨིནྡྲ་བུདྡྷིའི་ལྕམ་
ལྷ་མོ་དཔལ་མོས་རྗེ་བཙུན་བི་རཱུ་པ་ལ་གནང༌། དེས་ཨ་བ་དྷུ་ཏཱི་པ་ཆེན་པོའམ་བསོད་སྙོམས་པ་ཆེན་པོ་
ཞེས་གྲགས་པ་དེ་གནང་བ་ཡིན་ཏེ། ཡུལ་ཤར་ཕྱོགས་བྷངྒ་ལ་བ། རིགས་རྒྱལ་རིགས། ཕལ་ཆེན་པའི་སྡེ་བ་ལས་རབ་ཏུ་བྱུང༌། གསང་བ་འདུས་པ་འཇམ་པའི་རྡོ་རྗེ་ལ་རྣལ་འབྱོར་དུ་
བྱེད་པ་ཞིག་ཡིན་ཏེ། དེ་ནམ་ཞིག་ན་ཉི་ཟླ་ཁོང་དུ་ཆུད་པ་ལ་སོགས་པའི་རྨི་ལྟས་ལ་བརྟེན་ཞིང༌། བིར་ཝ་པའི་དྲུང་དུ་ཕྱིན་ཏེ་རྣལ་འབྱོར་མའི་དབང་བསྐུར་ཞུས་པས་དེ་ཉིད་དུ་ཞལ་གཟིགས། རྒྱུད་དང་
གདམས་ངག་ཐམས་ཅད་གསན་ཞིང་ཉམས་སུ་བླངས། དེ་ནས་བི་རཱུ་པས་སྤྱོད་པ་ལ་བསྐུལ།
སྤྱོད་པ་ལ་ཞུགས་ནས་གངྒའི་འགྲམ་ན་མུ་སྟེགས་པ་རྩེ་གསུམ་གྱི་སྟེང་དུ་མཆོངས་ཏེ་ཤི་བ་ལ་ཐར་བར་འཛིན་པ་དེའི་རྩེ་གསུམ་གཞན་གྱིས་བསྐྱོད་མི་ནུས་པ་ཞིག་ཡོད་པ་ཕྱུང་ནས་གངྒཱ་ལ་