[A:470]ཞུས་ནས་བདེ་མཆོག་མཁའ་འགྲོ་རྒྱ་མཚོའི་རྒྱུད་དང༌། དེའི་འགྲེལ་པ་གྲུབ་ཐོབ་མཚོ་སྐྱེས་ཀྱིས་མཛད་པ་དང༌། ཛ་ཡ་སེ་ནས་མཛད་པའི་དབང་དང་མངོན་པར་རྟོགས་པ་ལ་སོགས་པའི་རིན་པོ་ཆེ་སྣ་བདུན་དུ་གྲགས་པའི་གཞུང་རྣམས་ལ་འགྱུར་མཛད།
རྒྱུད་དང་འགྲེལ་པ་གཉིས་ལ་རང་གི་ཁུ་བོ་དཔལ་མཆོག་དང་པོའི་རྡོ་རྗེའི་བཀས་ཀྱང་འགྱུར་བཅོས་མཛད་དེ་སྒོ་དུ་མ་ནས་བོད་དུ་དར་བར་གྱུར་པ་ལས། ཆོས་རྗེ་རང་བྱུང་རྡོ་རྗེས་ཀྱང་
དེའི་ཡིག་ཆ་མང་དུ་མཛད། འགྲེལ་པ་མཛད་པ་པོ་མཚོ་སྐྱེས་དེ་ནི་འདི་ཉིད་ཀྱི་
བརྒྱུད་པ་ལ་ཡོད་པའི་པདྨ་རྡོ་རྗེ་དེ་ཉིད་ཡིན་པ་འདྲའོ། །
སྡོམ་པ་འབྱུང་བ་ལ་རཏྣ་རཀྵི་ཏས་འགྲེལ་བ་མཛད་ཅིང༌། ཆག་ལོ་ཙཱ་བ་ཡང་དེའི་
དངོས་སློབ་ཡིན་པས་བཤད་པའི་བཀའ་ཡོད་དམ་སེམས་སོ། །ཕྱིས་ནི་རྗེ་བཙུན་ཙོང་ཁ་པ་ཆེན་པོས་ཀྱང་
བུ་སྟོན་རིན་པོ་ཆེ་ལས་བརྒྱུད་ནས་རྩ་བའི་རྒྱུད་ལ་བཤད་རྒྱུད་དང་འགྲེལ་པ་ཆེན་པོ་རྣམས་གུང་ལེགས་
པར་བསྒྲིགས་པའི་ཊཱི་ཀ་དང༌། མངོན་རྟོགས་དང་དཀྱིལ་ཆོག །དྲིལ་བུ་པའི་ལུགས་ཀྱི་མངོན་དཀྱིལ། དྲིལ་བུ་རིམ་ལྔའི་རྣམ་པར་བཤད་པ། ལཱུ་ཡི་པའི་ལུགས་ཀྱི་རྫོགས་པའི་རིམ་པ་རྣལ་འབྱོར་ཆེན་པོ་
ཉམས་སུ་ལེན་ལུགས། ལཱུ་ཡི་པའི་མངོན་རྟོགས་ཀྱི་བཤད་པ་འདོད་འཇོ་རྣམས་མཛད་དེ། འཁོར་ལོ་སྡོམ་པའི་ལུགས་ཉམས་པར་གྱུར་པ་གསོ་བར་མཛད་དོ།
།བདེ་མཆོག་གི་སྐབས་སོ།