[A:469]རྩ་དགུ་པ་ལྕགས་ཁྱི་ལ་གཤེགས།
དེའི་སློབ་མ་བླ་མ་དམ་པ་རིན་པོ་ཆེ། ཞེས་འབོད་པ་དེ་ཤིང་མོ་ལུག་ལ་འཁྲུངས། བཅུ་དྲུག་པ་ལྕགས་ཁྱི་ལ་གདན་སར་བསྐོས། སོ་དགུ་པ་ཆུ་བྱ་ལ་གཤེགས། འདི་ལ་གཉན་ཐོག་ཇོ་འབུམ་ཟེར་བ་འདྲའོ། །དེ་ལྟར་བདེ་མཆོག་གི་བཤད་རྒྱུད་རིང་དུ་བྱུང་ངོ༌། །མཁས་པ་ཆེན་པོ་རྒྱ་ནམ་མཁའ་ལ་ཏྲེ་བོ་མགོན་པོས་བདེ་མཆོག་མར་དོའི་ལུགས་བཤད་པའི་རྒྱུད་བཞི་
དང་བཅས་པ་ལེགས་པར་གསན། དེ་ལ་ལྡུམ་ར་སྒང་པ་གཉན་རྡོ་རྗེ་སེང་གེས་གསན། དེས་སྙེ་མདོ་ཐམས་ཅད་མཁྱེན་པ་ལ་དགྱེས་པ་ཕུལ་དུ་བྱུང་བས་གནང་ངོ༌།
།མར་པ་དོ་པའི་ལོ་ཆུང་གྲགས་པ་ཤེས་རབ་ཀྱིས་ནི། མར་དོས་གསན་པའི་བླ་མ་རྣམས་ལ་ཡང་
རྒྱ་གར་དང་བལ་པོར་གསན་པ་མཛད་ལ། ཕྱིས་ནི་རྒྱལ་པོའི་སྲས་བྷཱི་མ་དེ་བ་ལ་
ཡང་མང་དུ་གསན་པ་མཛད་དེ། ཆོས་ལོ་ཆེན་པས་ལོ་ཆུང་ཆེའོ་ཞེས་གྲགས་པ་དེས་ཀྱང༌། སློབ་མ་མང་དུ་བསྡུས་ནས་བདེ་མཆོག་གི་བཤད་པ་རིང་ཞིག་ཏུ་མཛད་པའི་འཕྲོ་དེ་ཉིད་ལ། ལས་སྟོད་
ལྷོའི་ཤྲཱིའི་ཕུག་པར་མཚམས་མཛད་དེ། དེའི་མོད་ལ་མཁའ་སྤྱོད་དུ་གཤེགས་སོ།
།དེའི་རྗེས་སུ་དམར་ཆོས་ཀྱི་རྒྱལ་མཚན་ནས་བརྒྱུད་པ་ཙམ་མ་གཏོགས་སློབ་མ་གཞན་རྣམས་ལས་བཤད་པའི་རྒྱུན་བྱུང་བ་ཡང་མ་ཐོས་པ་ཉིད་ཀྱི་ཕྱིར་བྲི་བར་མ་ནུས་སོ། །གཞན་ཡང་རོང་གི་
སུམ་པ་ལོ་ཙཱ་བ་དྷརྨ་ཡོན་ཏན་གྱིས་བལ་པོར་བྱོན། པནྚི་ཏ་ཛ་ཡ་སེ་ན་ཞེས་ཀྱང་གྲགས། དམ་པ་ཁང་གསར་བ་ཞེས་ཀྱང་བྱ་བ། དུས་ཕྱིས་བོད་དུ་བྱོན་ནས་
རྗེ་བཙུན་གྲགས་པ་རྒྱལ་མཚན་གྱིས་ཀྱང་བསྟེན་པ་དེ་ལ་