[A:466]པར་ཞུས། རྩ་བའི་རྒྱུད་དང་ཀུན་སྤྱོད་གཉིས་ཀ་ལ་
དཔལ་སྒམ་པོ་བའི་བཀའ་ཊཱི་ཀ་རྒྱས་པར་མཛད། བསྐྱེད་རིམ་གྱི་བཤད་པ་དང༌། དྲིལ་བུ་བའི་རིམ་པ་ལྔ་པའི་འགྲེལ་པ་ཡང་མཛད་དོ། །མར་པ་དོ་བ་ཉིད་ཀྱིས་ཀྱང་
རྩ་བའི་རྒྱུད་དང་ཀུན་སྤྱོད་གཉིས་ཀ་ལ་བསྡུས་དོན་དང་ཊཱི་ཀ་རྒྱས་པར་མཛད།
མར་དོའི་སྲས་པོ་ནམ་མཁའ་འོད་ཅེས་བྱ་བ་འཁྲུངས་པ་ལ། ཡབ་ཀྱི་བཤད་པ་དང་གདམས་པ་
མ་ལུས་པ་མངའ་ཞིང༌། སྐྱིད་ཤོད་ལ་སོགས་པར་བྱོན་ནས། གདམས་པ་ཕྲན་རེ་རེ་ཙམ་
གཞན་ལ་བཤད་ན་ཡང༌། ཡབ་དང་དུས་གཅིག་ཏུ་གྲོངས་པས་འཕེལ་བ་ཆད་དོ། །གཟེ་བས་རང་གི་སྲས་བདེ་མཆོག་རྡོ་རྗེ་ལ་ལེགས་པར་གསུངས། དེ་ནས་བརྒྱུད་ནས་མང་དུ་འཕེལ། དེ་ལ་མཁྱེན་རབ་དབང་ཕྱུག་གིས་ནི་ཡང་རྩེ་བ་རིན་ཆེན་སེང་གེ་ལ་བདེ་མཆོག་གི་བཤད་པ་གསན། ཁོང་
གིས་ཁང་གསར་བ་བསོད་ནམས་མགོན་ལ་གསན་འདུག་ནའང༌། དེ་ཡན་གྱི་བརྒྱུད་པ་ངེས་པ་ཅན་
མ་རྙེད་གསུང་སྟེ། མར་དོ་ལུགས་ནི་ཡིན་ནོ།
།དབང་ནི། སངས་རྒྱས། ཡེ་ཤེས་མཁའ་འགྲོ་མ། ལཱུ་ཡི་བ། ཊེངྒི་བ། ལྭ་བ་པ། ཨིནྟྲ་བོ་དྷི། ཀ་ཙ་བ། དྲིལ་བུ་བ། ཛ་ལནྡྷ་ར་པ། ནག་པོ་པ། ཀུ་ཤ་ལ་ན། ཏི་ལླི་པ། ནཱ་རོ་པ། མན་ཀ་ཤྲཱི་ཛྙཱ་ན། བལ་པོ་བྷ་དནྟ། མར་པ་དོ་བ། གཟེ་བ་བློ་ལྡན། གཟེ་བ་ཇོ་བདེ། སློབ་དཔོན་ཁུ་ལྷས་པ། སློབ་དཔོན་ལྷོ་ཚང་བ། ལོ་ཙཱ་བ་མཆོག་ལྡན། བླ་མ་དཔལ་ལྡན་སེང་གེ བུ་སྟོན་ཏེ།
སྤྱིར་བུ་སྟོན་རིན་པོ་ཆེ་ལ་བདེ་མཆོག་གི་དབང་