[A:465]འདུག་པ་ཅི་ཡིན་དྲིས་པས། ནཱ་རོ་པ་ཕེབས་པ་ལ་བལྟ་བ་ཡིན་ཟེར། དེར་ཁྲོམ་གསེབ་ཏུ་ཕྱིན་ནས་ནཱ་རོ་པའི་དྲུང་དུ་སླེབ་ཙ་ན། གསེར་ཞོ་གང་ཕུལ་བས། ལན་གཅིག་ཕྱག་ཏུ་བཞེས་ནས་ས་ལ་བསྐྱུར། སྤྱན་ཆེར་བ་ཅིག་གཟིགས་བྱུང༌། གསུང་ནི་ཅི་ཡང་མ་བྱུང་སྟེ། བྱིན་གྱིས་བརླབས་པར་ངེས་ཤེས་སྐྱེས། དེ་ནས་རྒྱ་གར་དབུས་སུ་ཕེབས།
ལྷོ་བྲག་པའི་གསུང་བཞིན་དུ་ནཱ་རོ་པའི་སློབ་མ་མ་ན་ཀ་ཤྲཱི། པྲཛྙཱ་རཀྵི་ཏ། ཁ་ཆེ་བྱང་ཆུབ་བཟང་པོ། པྲ་མུ་ད་བཛྲ་རྣམས་ལ་ནཱ་རོ་པའི་ལུགས་ཀྱི་བདེ་མཆོག་གི་དབང་དང་རྒྱུད་དང་
མན་ངག་རྣམས་ལེགས་པར་གསན། པནྚི་ཏ་གཞན་ལ་ཆོས་མང་དུ་གསན།
ཕྱིར་བལ་པོར་ཕེབས་དུས་ཕམ་མཐིང་བ་དང༌། དེའི་གཅུང་པོ་ངག་གི་དབང་ཕྱུག་དང༌། བལ་པོ་ཀ་ན་ཀ་ཤྲཱི་རྣམས་ལ་ནཱ་རོ་པའི་ལུགས་ལེགས་པར་གསན། མཻ་ཏྲི་བའི་དངོས་ཀྱི་སློབ་མ་
རྒྱ་གར་ཕྱག་ན་བལ་པོ་ན་བཞུགས་པ་ལ་ཡང་ཆོས་མང་དུ་གསན། བལ་པོ་ཛ་ཧཱུྃ་གི་སློབ་མ་
བྲམ་ཟེ་ནག་པོ་ཞབས་ལ་ཡང་གསན་ཞིང༌། མཁས་པ་སུ་མ་ཏི་ཀཱིརྟཱི་ལ་བརྟེན་ནས་
བདེ་མཆོག་གི་སྐོར་གྱི་འགྱུར་ཡང་མང་དུ་མཛད།
བོད་དུ་ཕེབས་ནས་ལོ་ཙཱ་བ་དེ་ལ་སློབ་མ་བདེ་མཆོག་ཉན་པ་མང་དུ་ཡོད་ཀྱང༌། གཙང་གི་
མཁས་པ་རྒྱ་ནམ། ངོའི་གཟེ་བ་བློ་ལྡན། ཁམས་ཀྱི་ཅོག་རོ་ཆོས་རྒྱལ་རྣམས་ཀྱིས་
ཆོས་བརྒྱུད་ལེགས་པར་གཟུང༌། རྗེ་སྒམ་པོ་བའི་སློབ་མ་རྟོགས་པ་ཕུན་སུམ་ཚོགས་པ་དང་ལྡན་པ་
ལ་ཡག་པ་བྱང་ཆུབ་དངོས་གྲུབ་ཅེས་བྱ་བ་དེས་ཀྱང༌། བླ་དོར་མར་དོའི་ལུགས་ཀྱི་
བདེ་མཆོག་རྣམས་གཟེ་བ་ལ་ལེགས་