[A:435]མངོན་བརྗོད་བྱེད། །ཅེས་གསུངས་པའི་ཕྱིར་
ཉན་རང་དང་ཐེག་པ་ཆེན་པོ་བ་ཡང་ཤིན་ཏུ་སྐལ་པ་ཅན་མ་ཡིན་པ་དག་ལ་གསང་བར་བྱ་བ་ཉིད་ཀྱི་ཕྱིར། སངས་རྒྱས་རྣམས་ཀྱི་དོན་དམ་པའི་སྐུ་དང་གསུང་དང་ཐུགས་ལ་གསང་བ་ཞེས་བྱ་ལ། དེ་ཡང་
ཞིང་ཕྱོགས་གཅིག་པ་དང་གདུལ་བར་བྱ་བ་ཕྱོགས་གཅིག་པའི་དབང་དུ་བྱས་པའི་སངས་རྒྱས་ཀྱི་མ་ཡིན་པར། སངས་རྒྱས་ཐམས་ཅད་ཚོགས་པའམ་འདུས་པའི་བདག་ཉིད་ཅན་ཟུང་དུ་འཇུག་པའི་སྐུ་ལ་
རྡོ་རྗེ་འཆང་ཆེན་པོའི་སངས་རྒྱས་ཐམས་ཅད་ཅེས་བྱའོ། །དེ་ནི་མཐར་ཐུག་པའི་གནས་ཡིན་པའི་ཕྱིར། དེ་རྗོད་པར་བྱེད་པའི་རྒྱུད་ལ་ཡང་རྒྱུད་རྣམས་ཀུན་གྱི་སྤྱི་བོ་ཡིན་ནོ་ཞེས་བཤད་དོ།
།རྡོ་རྗེ་འཆང་ཞེས་བྱ་བ་ཡང་སྒྲོན་མ་གསལ་བ་ལས། རིགས་ཐམས་ཅད་ཀྱི་བདག་ཉིད་ཅན། ཐོག་མ་དང་ཐ་མ་མེད་པ། དང་པོའི་སངས་རྒྱས། རིག་པ་ཆེན་པོའི་སྐྱེས་བུའི་གཟུགས། ཡེ་ཤེས་ཀྱི་སྐུ། རང་བཞིན་གྱིས་འོད་གསལ་བའི་བདག་ཉིད་ཅན། འཇིག་རྟེན་གསུམ་གྱི་བདག་ཉིད་ཅན། སྐུ་གསུམ་གྱི་བདག་ཉིད་ཅན། ཐེག་པ་གསུམ་གྱི་བདག་ཉིད་ཅན། དུས་གསུམ་གྱི་བདག་ཉིད་ཅན། རྡོ་རྗེ་གསུམ་གྱི་བདག་ཉིད་ཅན། བདེན་པ་གཉིས་ཀྱི་བདག་ཉིད་ཅན། ཞེས་གསུངས་པས་ན། འདུས་པ་བ་ཁ་ཅིག་རྡོ་རྗེ་འཆང་ཆེན་པོའི་སྐུ་མདོག་དང་ཕྱག་མཚན་ཅི་ཡིན་པ་ཚོལ་ཞིང༌། སྐུ་མདོག་
དཀར་པོ་ཞལ་གཅིག་ཕྱག་གཉིས་པ་ཡིན་ནོ་ཞེས་བྱ་བ་ལ་སོགས་པ་སྨྲ་བ་ནི། ད་ལྟར་བཤད་པའི་
སྒྲོན་མ་གསལ་བའི་དོན་ཐུགས་སུ་མ་ཆུད་པ་ལས་ཡིན་པར་སྣང་ལ། འོན་ཀྱང་