[A:434]འཕགས་འོད་ཀྱིས་མང་དུ་གསན། འཕགས་འོད་ཀྱིས་བུ་རིན་པོ་ཆེ་ལ་དབང་དང་བཤད་པ་ཐམས་ཅད་ཀྱི་བུམ་པ་བྱོའོ། །བུ་རིན་པོ་ཆེས་ནི་རྣལ་འབྱོར་རྒྱུད་ཀྱི་བསྡུས་པའི་དོན་དང༌། འབྱུང་བའི་བཤད་པ་ཆེན་མོ་དང༌། གཞན་རྣམས་ཀྱི་དཀྱིལ་འཁོར་གྱི་ཆོ་ག་མང་དུ་མཛད། རྣལ་འབྱོར་རྒྱུད་ལ་བག་ཆགས་སད་ཅེས་ཀྱང་
གསུང་ངོ༌།
།དིང་སང་ནི་རྣལ་འབྱོར་རྒྱུད་ཀྱི་དབང་བཀའ་རྣམས་ཕལ་ཆེར་ཡོད་ཅིང༌། རྒྱུད་འགྲེལ་པ་
དང་བཅས་པའི་བཤད་པ་མཛད་པ་ནི་མ་མཐོང་ངོ༌། །ཡང་རྔོག་ཆོས་ཀྱི་རྡོ་རྗེས། དང་པོར་སྐྱི་བྱེ་མ་ལུང་པ་དང༌། དེ་ནས་ཁམས་པ་ཤེས་རབ་རྡོ་རྗེ་ལ་གསན་ནས་རིམ་པར་བརྒྱུད་དེ། དཀྱིལ་ཆོག་གསང་ལྡན་ལག་ལེན་དང་བཅས་པ། མཚན་ཡང་དག་པར་བརྗོད་པའི་བཤད་པ་ནི་རྔོག་པ་རྣམས་ལ་དིང་སང་གི་བར་དུ་ཡོད་དོ། །ཡོ་གའི་ལོ་རྒྱུས་ཀྱི་སྐབས། །
འདུས་པ་འཕགས་ལུགས་ཀྱི་སྐབས།
རྣལ་འབྱོར་ནང་གི་རྒྱུད་རྣམས་ལས་དཔལ་གསང་བ་འདུས་པའི་རྒྱུད་ཀྱི་བཤད་པ་ཇི་ལྟར་བྱུང་བ་འཆད་དེ། དེ་ལ་དཔལ་གསང་བ་འདུས་པའི་རྒྱུད་ཅེས་བྱ་བ་ཡང་བརྗོད་པར་བྱ་བ་དོན་གྱི་རྒྱུད་དང༌། རྗོད་པར་
བྱེད་པ་སྒྲའི་རྒྱུད་གཉིས་སུ་གནས་པ་ལས།
དོན་ནི་གསང་བ་འདུས་པ་ཞེས་བྱ་བ་ནི། སྐུ་གསུང་ཐུགས་ནི་རྣམ་པ་གསུམ། །གསང་བ་ཞེས་ནི་བཤད་པ་ཡིན། །ཚོགས་པ་འདུས་པར་རབ་བརྗོད་དེ། །སངས་རྒྱས་ཐམས་ཅད་