[A:༤༨༡]འབྱོར་ལྷུར་བླངས་པའི་ཚེ་དགྱེས་མཛད་རྡོ་རྗེ་ལྷ་དགུའི་དཀྱིལ་འཁོར་དང་གསང་འཁྲིད་ཀྱི་ཉམས་ལེན་གནང་བའི་དུས་མགོན་པོ་ལྷ་བརྒྱད་འཁོར་དྲེགས་པ་བརྒྱད་དང་བཅས་པ་གསལ་བར་གཟིགས། ཡང་ནུབ་ཅིག་མནལ་ལམ་དུ་མ་ཇོའི་རྣམ་པ་ཅན་ཞིག་གིས་རི་སུལ་གྱི་རྣལ་འབྱོར་མ་མཇལ་ན་འདི་ན་ཡོད་ཅེས་ཟེར་བར་དགྱེས་བཞིན་དུ་བུད་མེད་དེས་ལམ་སྣ་བྱས་ཏེ་ཕེབས་པས་དུར་ཁྲོད་ཆེན་པོ་བསིལ་བའི་ཚལ་ཡིན་རྒྱུ་བའི་ཤིང་ཐོ་རེ་ཡོད་པའི་དབུས་ན་རྡོ་ཕུང་ཞིག་གི་གསེབ་ཏུ་གནམ་སྒོ་འདུག་པ་ཕྱེ་སྟེ་འདི་ན་ཡོད་ཟེར་བ་གཟིགས་པས་ཞལ་བྲམ་གཟུགས་དཀར་པོ་རལ་པའི་ཐོར་ཚུགས་ཅན་རས་དཀར་པོ་གྱོན་པ་ཕྱེད་ཀྲུང་དུ་བཞུགས་པ་ཕྱག་གཡས་ན་ཐོད་ཁྲག་དང་གཡོན་ན་མི་རྐང་གི་གླིང་བུ་དང་ཤིང་གི་བུམ་པ་འཛིན་པ། འོད་ཟེར་དུ་མ་འཕྲོ་བ་ཞིག་གཟིགས། དེ་ནས་ཀྱང་འབྲལ་མེད་ལྟ་བུར་དངོས་སུ་ཡང་ཡང་འབྱོན་ཞིང་ལས་ཐམས་ཅད་བསྒྲུབས་པར་མཆིས། གདན་ས་ཆེན་པོ་དཔལ་ལྡན་ས་སྐྱར་ཕེབས་ནས་རྟེན་བརྟེན་པ་ཐམས་ཅད་ཞིབ་མོར་མཇལ་བ་གནང་ཞིང་ཁྱད་པར་མགོན་པོ་དངོས་སུ་གཟིགས། དགེ་འཕེལ་དུ་རྟེན་བཞེངས་ཀྱི་ཚེ་སྐུ་འབག་གི་ཞལ་རྡུལ་འཕྱི་བ་མཛད་པས་པུ་ཏྲས་དངོས་སུ་འོངས་ཏེ་འཕྱི་ལུགས་འདི་བཞིན་བྱེད་དགོས་ཞུས། དགུང་ལོ་ཉི་ཤུ་རྩ་བཞི་ཙམ་ལ་བབས་པའི་ཚེ་གདན་ས་འོག་ནས་བདག་ཆེན་རིན་པོ་ཆེ་ངག་གི་དབང་ཕྱུག་གི་ཞབས་ཕྱི་མཛད་ནས་དབུས་ཕྱོགས་སུ་ཕེབས། གསུང་ངག་ལམ་འབྲས། གཤེད་དམར་གྱི་དབང་བྱིན་རླབས་སྤྲོས་མེད་ཀྱི་འཁྲིད། རྡོ་རྗེ་འཕྲེང་བའི་དབང་སོགས་བཀའ་ཆོས་མང་དུ་གསན། གལ་