[A:༤༧༤]ཞིག་ཏུ་ཤར་ཞིང་སྙུན་རོ་སོགས་བགེགས་ཀྱི་རྣམ་པ་འདྲ་བའང་སངས། མན་ངག་གཡུལ་ལས་རྣམ་རྒྱལ་གྱི་ལས་སྦྱོར་མཛད་པས་ཞག་འགའ་ནས་བསྒྲལ་བྱ་དེ་པུ་ཏྲས་དངོས་སུ་ཁྲིད། ལས་འདི་བཞིན་བསྒྲུབས་ཡོད་པས་གཏང་རག་ཏུ་བསྐང་གསོ་ཞིག་འཕྲལ་རྩོམ་གྱིས་བསྐུལ་མ་བྱུང་བ་ལྟར་བསྐང་གསོ་ཁྱད་ཅན་དེ་ཐུགས་རྩོམ་མཛད། གཞན་ཡང་དུར་ཁྲོད་བདག་པོ། དཀར་བདུད་སོགས་ས་སྐྱ་པའི་ཟབ་ཆོས་སུ་གྲགས་པའི་དབང་ལུང་དུ་མ། གཤེད་དམར་ལྷ་ལྔའི་དབང་བྱིན་རླབས་སྤྲོས་མེད་ཀྱི་འཁྲིད། འཇིགས་བྱེད་རྭ་ལུགས། ནག་པོ་མཚོ་སྐྱེས་ཌོམ་བྷི་སྟེ་ཀྱེ་རྡོར་ལུགས་གསུམ་སོགས་བླ་མེད་ཀྱི་དབང་མང་བ། གསེར་ཆོས་རྣམ་པ་ལྔར་གྲགས་པ་རྩ་བ་ནེ་གུ་ཆོས་དྲུག །སྡོང་པོ་ཕྱག་རྒྱ་ཆེན་པོ། ཡལ་ག་ལམ་འཁྱེར་རྣམ་གསུམ། མེ་ཏོག་མཁའ་སྤྱོད་དཀར་དམར། འབྲས་བུ་འཆི་མེད་རང་གྲོལ་རྣམས་དང༌། དེ་དག་དང་འབྲེལ་བར་ནེ་གུའི་དབང་བྱིན་རླབས་ཉེར་ལྔ་སོགས་དང༌། རྒྱབ་ཆོས་སུ་ཡིག་སྐོར་གྱི་ལུང་ཚང་ལ་མ་ནོར་བར་གསན། སུ་ཁ་སིདྡྷིའི་དབང་དང་དེ་དག་དང་འབྲེལ་བའི་ཡིག་སྣ། སྒྲུབ་ཐབས་བརྒྱ་རྩ་རྒྱ་གཞུང་དང་བཅས་པ་སོགས་མདོར་ན་རྗེ་བཙུན་ཉིད་ལ་མངའ་བའི་ཟབ་ཆོས་རྣམས་ལྷག་མ་ལུས་པ་ལྟ་བུར་གསན་པ་མིང་ཙམ་དུ་མ་བཞག་པར་ཚིག་དོན་གྱི་ཆ་ལ་སྒྲོ་འདོགས་བཅད། ཐུགས་ཉམས་སུ་གང་བསྟར་བ་མཐའ་དག་ལ་ཉམས་རྟགས་དང་དངོས་གྲུབ་མ་ཐོབ་པ་མེད་ཅིང་གཙོ་བོར་བིརྺ་པ་དང་ནཱ་རོ་ཏ་པའི་གསང་ཆེན་སློབ་བཤད་ལ་བརྟེན་ནས་མཆོག་གི་དངོས་གྲུབ། དམར་པོ་སྐོར་གསུམ་དང་མགོན་པོ་ཆེ་ཆུང་སོགས་ལ་བརྟེན་ནས་