[A:༤༧༣]རྒྱན་དུ་བསྟེན། །ཅི་གསུང་བཀའ་རྣམས་འབད་པས་བསྒྲུབས། །སྐྱབས་གཞན་སྤངས་ནས་གཅིག་ཏུ་དྲིལ། །དེ་ཡི་མཐུ་ལས་ཐུགས་རྗེའི་རྒྱུན། །བཀའ་དྲིན་བདུད་རྩིས་སྙིང་མྱོས་པའི། །ཚུལ་བཞིན་ཤེས་པ་ཁོ་བོར་གདའ། །ཞེས་གསུངས། གསང་འཁྲིད་ཀྱི་རྗེས་གནང་དང་གསང་འཁྲིད་དངོས་གཞི། ལས་བཞིའི་མགོན་པོའི་རྗེས་གནང་སོགས་ཁ་ཤས་མ་གཏོགས་དཔལ་མགོན་སྟོབས་འཕྲོག་དབང་པོ་གདོང་བཞི་པའི་རྗེས་གནང་སྤུ་གྲི་སོ་རྡེབ་དང་ཚེ་སྒྲུབ་སྲུང་འཁོར་གྱི་འཁྲིད་ལས་ཚོགས་ཡིག་ཆུང་ཤོག་དྲིལ། དེར་མ་འཁོད་པ་སྙན་ནས་སྙན་དུ་བརྒྱུད་པའི་གདམས་པ་སོགས་ཚང་བར་གསན། ཞལ་གྱི་རྗེས་གནང་སྐབས་རྗེ་ཉིད་ཀྱི་སྐུའི་མདངས་ན་བཟའི་ཁ་དོག་སོགས་མཐིང་ཁར་གཟིགས་ཤིང་ཁྱད་པར་ཡེ་ཤེས་དབབ་པའི་བར་ལ་བར་སྣང་ནས་མི་རྐང་གི་སྒྲ་ཤིན་ཏུ་གསལ་བ་དང་ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ་ཞེས་སོགས་བཀྲ་ཤིས་ཀྱི་ཚིགས་བཅད་དབྱངས་དང་བཅས་ནས་སྒྲོག་པ་གསལ་བར་གསན། ཁྱད་པར་མགོན་པོ་གདོང་བརྙན་ཅན་གྱི་རྗེས་གནང་གསན་པའི་ཚེ་ཕྱག་མཛད་པ་ནས་བཟུང་འཇིགས་པས་སྐུ་ལུས་ཀྱི་ཚོ་མི་ཐུབ་པ་ལྟ་བུ་དང་ཡེ་ཤེས་དབབ་དུས་མགོན་ཁང་རྡིབ་པ་འདྲ་བ་དང་ཁའུའི་རི་ཐམས་ཅད་ཉིལ་བ་བཞིན་གྱི་ཚག་སྒྲ་འུར་སྒྲས་ཁྱབ་པས་རེ་ཞིག་ཐུགས་དྲན་མེད་དུ་སོང༌། ཐུགས་དྲན་རྙེད་ཚེ་གནས་ལུགས་དོན་གྱི་མགོན་པོ་རང་རྒྱུད་ལ་ཤར་བའི་བདེ་བ་ཆེན་པོ་བྱིན་རླབས་ཀྱི་ཆུ་བོ་མ་ནུབ་པ་ཡིན་གསུང་བྱུང་བ་ན་བླ་མའི་ཞལ་ལ་གཟིགས་པར་མི་བཟོད་པ་འཇིགས་སུ་རུང་བ་