[A:༤༦༨]མ་དམ་པ་འདིའི་ཞབས་པད་ཡུན་དུ་བསྙེན་པའི་ཆེད་དུ་དོན་མེད་ཀྱི་གཡེང་བའི་འདུ་འཛི་ཐམས་ཅད་རྒྱང་དུ་བསྲིངས། བགྲང་བྱ་དུ་མར་བག་ཕབ་སྟེ་བཞུགས་ནས་དམ་པའི་ཆོས་ཀྱི་བཀའ་དྲིན་ནོད་པ་ནི། འཇིག་རྟེན་གྱི་མིག་གཅིག་པུ་འབྲོག་མིས་འཕགས་པའི་ཡུལ་དུ་པཎ་གྲུབ་ཤྲཱི་ལེནྡྲ་རུ་ཙིའམ་སློབ་དཔོན་མི་ཐུབ་ཟླ་བར་གྲགས་པ་ལ་རྩ་བ་མེད་པའི་ལམ་འབྲས་ཤིག་གསན་ཞིང་ཡོངས་སུ་གྲགས་པ་མུ་གུ་ལུང་དུ་པཎ་ཆེན་གྷ་ཡ་དྷ་ར་ལ་རྫོགས་པར་ཞུས་ཏེ་རིམ་གྱིས་འཕེལ་བར་བཀའ་སྲོལ་མི་འདྲ་བ་བཅོ་བརྒྱད་ཙམ་བྱུང་ཟེར་ཡང༌། གཙོ་བོར་གྱུར་པ་རྗེ་བཙུན་ས་སྐྱ་པ་ཆེན་པོར་བཀའ་བབས་པ་ཡིན་ལ། དེ་ལའང་ཚོགས་བཤད་ངོར་རྫོང་གོང་དཀར་བ་གསུམ་ལ་དར་རྒྱས་ཆེ་ནའང་རྗེས་འབྲང་གི་མཁས་གྲུབ་ཕལ་ཆེར་གྱི་མིག་དང་རྣ་བའི་སྤྱོད་ཡུལ་དུ་མ་གྱུར་པ་གསང་བ་ལས་ཀྱང་ཆེས་གསང་བ་བདག་ཆེན་རྡོ་རྗེ་འཆང་གིས་ཡབ་འཇམ་དབྱངས་ཆེན་པོ་དང༌། རྡོ་རྗེ་འཆང་ཀུན་དགའ་བཟང་པོས་འཁོར་ལོ་སྡོམ་པ་དཀོན་ཅོག་རྒྱལ་མཚན་ཁོ་ནར་སྩལ་བ་ཆུ་བོ་གཉིས་འདྲེས་ཀྱི་ཚུལ་དུ་ཐུགས་ཀྱི་བུམ་པ་གཏམས་པ་ལས་ཉེ་བར་འོངས་པ་སྙན་བརྒྱུད་སློབ་བཤད་ཀྱི་ཉམས་འཁྲིད་ཟབ་མོ་ལན་གྲངས་གསུམ་གྱི་བར་དུ་སྨིན་རྒྱས་སུ་གསན་པའི་ཆ་ལག་དཔལ་ཀྱེ་རྡོ་རྗེའི་རྒྱུ་དུས་ཀྱི་དབང༌། བདག་མེད་ལྷ་མོ་བཅོ་ལྔའི་དབང༌། དེའི་སིནྡྷཱུ་རའི་བྱིན་རླབས་ལམ་དུས་ཀྱི་དབང༌། ལམ་སྦས་བཤད་བྱིན་རླབས་འཁྲིད་དང་བཅས་པ། གསང་བའི་ལམ་ཟབ་འཁྲིད་དང་བཅས་པ། ནང་གི་ལམ་ཟབ་ལུས་དཀྱིལ་ལ་རྣལ་འབྱོར་དབང་ཕྱུག་གི་ཐུན་མོང་དང་ཐུན་མོང་མ་ཡིན་པའི་