[A:༤༦༧]སྐུ་ཞབས་སུ་བཏང་བའི་ཚེ་རས་ཡུག་དཀར་པོ་སྣེ་ཚང་བའི་མཇལ་དར་ཕུལ། ཆོས་རྗེའི་དྲུང་ཕེབས་ལམ་ལ་འོ་མི་བརྒྱལ་ཞིང་བདེ་བར་བྱོན་པ་བཀའ་དྲིན་ཆེ་གསུངས། སྔོན་ནས་ཞལ་མཇལ་ཞིང་ཐུགས་མོས་ཆེ་བའི་སྟེང་བཤེས་སྤྲིངས་ལས། རྡོ་ཐལ་གྱིས་བྱུགས་དགུང་ཟླའི་འོད་ཀྱིས་ནི། །ཆེས་དཀར་ཉིད་དུ་ཅི་སྟེ་མི་བགྱིད་ལགས། །ཞེས་སྔ་རབས་ཀྱང་ཆེས་ཆེར་ལྷག་པའི་ཐུགས་མོས་འཁྲུངས་བཀྲ་ཤིས་ལྷུན་པོའི་ཁྲོན་པ་ཁའི་གནས་ཚུལ་ཞུས་ནས་དཔེ་དེ་གཟིགས་ཕུལ་བས་བཞད་མོ་མཛད་པ་དང་སྦྲགས་པ༵འི་མཁའ་སྤྱོད་མས་གདན་འདྲེན་ལ་ཕྱིན་གདའ་བ་གླེགས་བམ་འདིའང་དེའི་ཆོས་སྐོར་ཡིན། ད་རེ་ཞིག་དཔེ་ཁྲོད་དུ་སྐྱོལ་མཛོད་གསུངས་པ་བཞིན་ཕྱག་དཔེའི་ཁྲོད་དུ་སྐྱེལ་བར་ཕེབས་པས་དཔེ་རགས་བརྩིགས་པའི་གསེབ་ནས་དཔེ་དེ་གཏོན་ཤུལ་ཧར་རེ་འདུག་པ་དེར་བཅུག་པས་ཁྲིག་འགྲིག་སོང་བས་དད་པ་དང་ངོ་མཚར་དཔེ་གང་གིས་ཀྱང་མཚོན་དུ་མེད་པ་ཐོབ་པའི་གསུང་སྒྲོས་གནང་བ་ལམ་ཡིག་ཏུ་ལར་འདི་སྐོར་གྱི་གཏམ་མང་པོ་ཞིག་ཡོད་ཀྱང་གསང་བའི་དོན་དུ་མངོན། ཕྱི་ལྟར་དུ་ཞིང་སྐྱོང་དབང་པོ་མངོན་སུམ་དུ་བཞུགས་པའི་དབེན་གནས་ཁའུ་བྲག་རྫོང་གི་རྣལ་འབྱོར་སྤྱོད་པའི་འདུས་སྡེ་རྣམས་མཛེས་པའི་རྒྱན། ནང་ལྟར་དུ་ལྷ་སྔགས་ཡེ་ཤེས་ཀྱི་ནུས་པས་རྡོ་རྗེའི་ཆོས་སྐྱོང་མཐའ་དག་བྲན་དུ་འཁོལ་བའི་མཐུ་སྟོབས་ཀྱི་གད་བརྒྱངས་སྲིད་རྩེའི་བར་དུ་སྒྲོག་པའི་དཔའ་བོ། །གསང་བ་ལྟར་ན་བདེ་སྟོང་ཟུང་དུ་འཇུག་པའི་སྒྱུ་མའི་གར་གྱིས་དཀྱིལ་འཁོར་རྒྱ་མཚོ་སྤྲོ་བ་དང་བསྡུ་བའི་བྱེད་པོ་ཁྱབ་བདག་རྡོ་རྗེ་སེམས་དཔའ་དངོས་དཔལ་ལྡན་བླ་