[A:༤༥༣]གསུམ་བྱུང་བའི་འཁྲུལ་པ་མེད་པ་ནི། རྒྱུད་གབ་པ་གནད་གཟེར་ལས། དགུན་ཉི་ལྡོག་པའི་ཚེས་སྔ་མ། །ལོ་ནི་སྔ་མའི་མཇུག་ཡིན་ལ། །ལོག་ཉིན་ཕྱི་མའི་འགོ་བོ་སྟེ། །སྔ་ལོ་ཕྱི་ལོའི་འཕོ་འཚམས་ཀྱི། །ཕོ་བྲང་ལྷ་ཚོགས་ཐམས་ཅད་དང༌། །ས་བདག་རྗེ་བློན་འཁོར་བཅས་རྣམས། །དགུན་ཉི་ལྡོག་ནས་བསྐྱ་བར་བྱེད། །ཅེས་སྨལ་པོའི་ཟླ་བའམ་ཧོར་ཟླ་བཅུ་གཅིག་པ་དཔྱིད་ར་སྟག་ཏུ་གྲ་ཕུག་པ་བ་སོགས་ཚད་ཐུབ་ཀྱི་མཁས་པ་མང་པོ་བཞེད་པ། འཕགས་སྐྱེས་པོའི་རྟོགས་པ་བརྗོད་པའི་ཡལ་འདབ་ཏུ། དེ་ནས་ཡིད་སྲུབས་ལོངས་སྤྱོད་གྲོགས། །སྦྲང་རྩི་འཐུང་བ་རྣམས་ཀྱི་གཉེན། །སྐལ་བཟང་འཁྲི་ཤིང་འཁྱུད་བྱེད་པ། །ལེགས་ལྡན་དཔྱིད་ནི་མཐོང་བར་གྱུར། །ཅེས་དཔྱིད་ཟླ་འབྲིང་པོ་ཉ་རོ་ཧཱི་ཏའི་ཁྱིམ་རྒྱལ་གྱི་ཟླ་བའི་དཔའ་བོ་མཁའ་འགྲོ་འདུ་བའི་ཚེས་བཅུའི་རེས་གཟའ་ཉི་མ། ཟླ་སྐར་སྨིན་དྲུག་གི་རེས་ལ་བབས་པའི་ཚེ་རྨུ་གཤོང་དགེ་བའི་ཚལ་ཞེས་སུམ་རྩེན་གྱི་གཞལ་ཡས་ཁང་ལ་ཅོ་འདྲི་བ་དེར། གཙུག་ན་ནོར་བུའི་རྟོགས་པ་བརྗོད་པའི་ཡལ་འདབ་ཏུ། དེ་ནས་དུས་ནི་ཡོངས་རྫོགས་ཏེ། །མཁའ་ལ་བདུད་རྩིའི་འོད་ཟེར་བཞིན། །འགྲོ་བའི་རབ་རིབ་ཀུན་འཇོམས་བུ། །ལྷ་མོ་ལ་ནི་བཙས་པར་གྱུར། །ཅེས་ཡུམ་ལ་སྙུན་སོགས་གང་ཡང་མི་མངའ་བར་སྟོན་གྱི་ནམ་མཁའ་གཡའ་དག་པ་ལ་རི་བོང་འཛིན་པའི་དཀྱིལ་འཁོར་ཉ་གང་བ་བཞིན་སྐུ་བལྟམས་པས་གསུང་མགུར་ལས། སེར་གཟུགས་བདག་གི་སྐྱེས་པའི་ཡུལ། །གངས་རིའི་ཁྲོད་ཀྱི་གཙང་སྟོད་ཆ། །ཆུ་བོ་པཀྵུའི་ལྷོ་ཡི་ངོས། །གྲུམ་སྟོད་ས་སྐྱའི་བྱ་འདབས་