[A:༤༥༤]ལྗོངས། །འབྲོག་མི་ལོ་ཙཱའི་གནས་ཀྱི་མདའ། །འཕྲང་གསུམ་ནང་ནས་སྲིན་འཕྲང་གདོང༌། །རྨུ་རྗེ་བཙད་པོས་བཟུང་བའི་ས། །དེར་ནི་སྔོན་གྱི་ལས་དབང་གིས། །དལ་འབྱོར་རིན་ཅེན་རྙེད་པ་ཡིན། །ཞེས་གསུངས་སོ། །ཁ་བའི་རྡུལ་བརྩེགས་ཤེལ་དཀར་རྡོ་ལེབ་བཀྲམ། །མར་གད་གོས་ཀླུབས་འཛིན་མར་ལྗོན་པའི་ཚལ། །ཡིད་འོང་ཆུ་སྐྱེས་ལོ་ཏོག་བཀྲ་བའི་འགྲམ། །གནམ་སྔོན་ཞུན་མའི་ཉལ་འགྲོ་དལ་གྱིས་འབབ། །ཕུལ་བྱུང་ངོ་མཚར་བཀོད་པའི་ཁང་བཟང་གིས། །འཆི་མེད་བ་གམ་མཛེས་པ་ལ་འཁུ་བའི། །ཁོ་ར་ཁོར་ཡུག་ཁྱབ་པ་གྲོང་ཁྱེར་གྱི། །གྲགས་པས་རྒྱུ་སྐར་ཚོགས་རྣམས་བལྟ་བ་བཞིན། །འཇམ་དཔལ་རྡོ་རྗེ་འཕགས་པའི་ཞབས་པད་རྡུལ། །དམར་འོད་གཙུག་ཏུ་ལྷུངས་པའི་ཡུས་པོ་ཆེ། །བསྟན་སྲིད་བླ་ནས་བླར་འདེགས་རི་མོའི་རྗེས། །མིག་གསུམ་འཕྲུལ་ཅན་དེས་ཀྱང་ག་ལ་ཁེབས། །ཀ་བ་མེད་པའི་གནམ་གྱི་སྒོ་མོ་ནས། །ཚངས་པ་མི་གཟུགས་ཧོར་གྱི་རྒྱལ་པོའི་ལུང༌། །བཙན་པོས་སྤྱི་བོ་གྱེན་དུ་བསྟན་ནོ་ཅོག །ཀུན་གྱིས་གཏུད་བྱའི་དཔོན་ཆེན་ལས་ཀས་མཐོ། །གཙང་བྱེད་པདྨའི་སྦུབས་ནས་ཐོན་པའི་ཅོ། །འདྲི་བའི་རྫུན་མིན་བདེན་གཏམ་སྐྱ་རེངས་མས། །མངལ་སྐྱེས་ཉེར་དྲངས་ཚེ་དབང་རིག་འཛིན་ནི། །ཤར་བའི་འོད་སྟོང་འབར་ལ་སུ་ཡིས་བསྙོན། །ཤེས་རབ་རལ་གྲི་སྀནྡྷུ་ཝཱ་རའི་མདངས། །མ་རིག་དྲ་བ་འཇོམས་པ་རྣོན་པོའི་མཚོན། །ཆོས་ཕུང་རིན་ཅེན་འབྱུང་གནས་གཅིག་པུ་པ། །སྒྲུབ་པའི་དགེ་མཚན་མངོན་སུམ་ལྟ་བུར་གསལ། །ཁུངས་བཙུན་རིགས་ཀྱི་ལང་ཚོ་དར་བའི་རྗེ། །བཞིན་མཛེས་དགའ་མར་འཁྱུད་པའི་