[A:༤༥༡]ལ་མོས་པ་དཀོན་ཅོག་ལ་བླ་མར་འཛིན་ཅིང་དགེ་འདུན་ལ་རྙེད་བཀུར་དང་ངན་ལོང་ལ་སྦྱིན་གཏོང་བརྩོན་པ། བྱམས་པ་དང་སྙིང་རྗེས་རྒྱུད་དུལ་བ། ཁྱད་པར་སྟག་ཚང་ལོ་ཙཱ་བར་ཤིན་ཏུ་དད་ཅིང༌། དེ་ནས་བརྒྱུད་པའི་ཆོས་ཉམས་སུ་ལེན་པར་གཞོལ་བ་དེ་གཉིས་དམ་པ་འདི་དང་ལྕམ་སྲིང་ལྔ་ཙམ་གྱི་ཡབ་ཡུམ་ཡིན་ཅིང༌། ཚེས་བཅུའི་དུས་ཆེན་ཞིག་ལ་སངས་རྒྱས་ཀུན་འདུས་རྡོ་རྗེ་དྲག་པོ་རྩལ་གྱི་འཕྲིན་ལས་གྱེར་བའི་ནུབ་ཡུམ་གྱིས་དཔལ་གཏོར་ཕྱོགས་ལ་དབུ་སྔས་བསྟད་དེ་གཟིམས་པ་ན་མནལ་ལམ་དུ་དཔལ་གཏོར་གྱི་པད་འདབ་གཅིག་ཆད་པའི་རྣམ་པས་སྒོ་དབྱེ་བ་ལྟ་བུ་བྱས། དེའི་ནང་ནས་གུ་རུ་རིན་པོ་ཆེའི་སྐུ་ཡིད་དུ་འོང་བ་འོད་ཟེར་དང་བཅས་པ་ཞིག་སེང་གེ་ལ་བཅིབས་ཏེ་ཐལ་མར་བྱུང་ནས་ཐུགས་ཀར་ཐིམ་པ་དང༌། ཡང་ནུབ་ཅིག་སྟག་ཚང་ལོ་ཙཱ་བ་དཔོན་སློབ་ནས་ངེད་ཚོར་དོ་ནུབ་གནས་ཚང་དགོས་འདུག་པས་ནང་སོར་ཞུས་པའི་སྡོད་ཡུལ་གཡོར་གསུང་པ་ལྟར་སྟ་གོན་མཛད་པའི་ཚེ་བླ་མ་དེ་འཇམ་དབྱངས་དམར་སེར་གྱི་རྣམ་པར་གྱུར་པ་ཐུགས་ཀར་ཐིམ་པའི་སྣང་བ་བྱུང༌། མནལ་སད་ཙ་ན་ལུས་ཤིན་སྦྱངས་ཀྱི་བདེ་བ་ལྟ་བུར་ཡུག་ཅིག་ལུས་པས་ཞལ་ཏ་མ་ཞིག་གིས་ད་བཞེངས། ལས་ཐེབས་འཆག་ཟེར་བས་ཉམས་དེ་སད་ཀྱང་དེ་ཉིན་གྱི་ཕྱག་ལས་མཐའ་དག་སྔར་དང་མི་འདྲ་བའི་བདེ་བ་དེ་ཀའི་ངང་དུ་འགྲོ་བ་ཞིག་བྱུང༌། གནས་པ་དེ་ནམ་བྱུང་བའི་དུས་དངོས་སུ་མེ་ཏོག་གི་ཆར། འཇའ་དཀར་པོ། སྔར་ཚོར་མ་མྱོང་བའི་དྲི་བཟང་པོ་འཐུལ་བ་ཡོང་ཞིང༌། ཡང་མནལ་ལམ་དུ་མི་ཞིག་གིས་གཡུ་སྟེར་བ། གསེར་གྱི་མཆོད་