[A:༤༥༠]ཁྱད་པར་ཁྱི་ལོ་དམག་ཆེན་གྱི་དུས་རྫོང་གི་རྩེ་ཞོལ་སྲུང་བ་གང་ཁག་པ་ཐམས་ཅད་དུ་ཕེབས་ནས་སྒྱོགས་མདའ་རྡོས་ནང་སྤྲད་པས་གཤིན་རྗེ་ངོ་དམར་དུ་གྲགས་ཤིང་ཕྱི་ནས་གདོང་ལེན་མི་སུ་ཡང་མེད་པ་བྱུང་ངོ༌། །གཞན་ཡང་དམག་ཆེ་ཆུང་འཐབ་སྲོལ་སྔ་ཕྱི་མང་པོའི་འགོ་ལ་བྱོན་ནས་དུས་ནམ་ཡང་གདོང་འབུད་ངོ་ལང་ཁོ་ན་མཛད་ཅིང་ཕྱིས་སྐོར་བྱ་བ་གང་ལའང་གཏན་བརླིང་གཙོ་བོར་བཏོན་པས་ཕྱི་ནང་ཀུན་གྱིས་འདི་ནི་དཔའ་མཛངས་འཛོམ་པའི་སྐྱེས་བུ་ཆེན་པོ་ཡིན་ཞེས་གྲགས་སོ། །དེའི་གཅུང་པོ་རྒྱལ་བཟང་རིན་ཅེན། རྒྱ་མཚོ་རིན་ཅེན། ནོར་བུ་རིན་ཅེན། གྲུབ་པ་རིན་ཅེན་རྣམས་ཡིན་ལ། གཅུང་འདིས་རྫོང་རབ་འབྱོར་རྩེ་བཟུང་ཚར་ཤྭོན་བོད་འབྲོག་གསར་དུ་ཆོད། གཅེན་གྱི་ཁབ་ཏུ་གདུང་བརྒྱུད་ལམ་མོ་བྱང་སེམས་ནམ་མཁའ་རྒྱལ་མོ་བ་བྱོན་སྲས་ཆེ་བ་ཆོས་རྒྱལ་རིན་ཅེན་པ་མཆེད་གསུམ་སྟེ། སྐུ་མཆེད་ཁུ་དབོན་ཞལ་ངོ་ཡང་མང་ལ་རགས་པ་སྐུ་བརྟན་པར་བཞུགས་པར་ལགས་པ། བློན་ཆེན་ཆེ་བརྒྱུད་མ་སངས་སྤྲུལ་པའི་རིགས། །ཁ་དྲག་མི་དཔུང་འཛོམ་པ་འཁོར་བཅས་འདི། །ཕས་རྒོལ་མི་མཐུན་ཕྱོགས་ལས་རྒྱལ་བ་དང༌། །དཔལ་འབྱོར་ཡར་ངོའི་ཟླ་ལྟར་རྒྱས་གྱུར་ཅིག །ཅེས་བྱུང་བའི་མེས་དྲུང་ཆེན་ནམ་མཁའ་རིན་ཅེན་ཡན་ཆད་ཤངས་པ་ཡིན་ནའང༌། དེ་ནས་ལ་སྟོད་དུ་གཞིས་བཟུང་བ་ཡིན་ཅིང༌། དེ་ཡང་ཆོས་རྒྱལ་རིན་ཅེན་དཔལ་བཟང་ཞེས་ཡི་དམ་གྱི་ལྷས་རྗེས་སུ་བཟུང་ཞིང་དཔལ་མགོན་སྟག་ཞོན་བྲན་དུ་འཁོལ་བའི་མཐུ་སྟོབས་ཀྱི་དབང་ཕྱུག་དེའི་ཇོ་མོར་མཁའ་འགྲོའི་རིགས་ཅན། བོན་པོ་དབེན་རྩ་ཁ་པའི་སྲས་མོ་བཀྲ་ཤིས་ཨ་མཚོ་ཞེས་པ་སྔོན་གྱི་ལས་འཕྲོས་ཆོས་