[A:༤༤༣]དང་དཔོན་ཆེན་རྒྱལ་བ་བཟང་པོ་བྱུང༌། དུ་དབེན་ཤ་ཀུན་དགའ་རྡོ་རྗེ་ལ་སྲས་ཁྲི་དཔོན་དཀོན་ཅོག་རྒྱལ་མཚན་བྱུང༌། ཁྲི་དཔོན་རྒྱལ་གྱིས་ཡབ་ཀྱི་ཤུལ་དུ་བྱ་རུའི་ཁྲི་དཔོན་ཐོག་གཅིག་བྱས་སྐུ་གཤེགས། སྲས་མེད་པས་དཀོན་ཅོག་རྒྱལ་མཚན་ཁྲི་དཔོན་ལ་བསྐོས། བླ་ཆེན་ཀུན་བློའི་ཕྱགས་ཕྱིར་གོང་མ་བྱོན་ཡན་ཕེབས་ཇོ་མོ་སྲེག་ཤིང་དཔོན་མོ་བླངས་ནས་མཐོང་སྨོན་ས་ཆ། ལྷ་ཁང༌། སྤང་གྲོང་གི་ཁ་འཛིན་བྱེད་དུས་སྲས་བཞི་བྱུང་བའི་ཆེ་བ་དབོན་པོ་དཀོན་ཅོག་འོད་ཟེར་དང་དཀོན་ཅོག་རིན་ཅེན། མཁན་པོ་བསོད་ནམས་བློ་གྲོས། ཆུང་བ་རྒོད་པོ་རིན་ཆེན་རྣམས་བྱུང་ངོ༌། །གཅུང་པོ་འདི་མ་སངས་ཀྱི་སྤྲུལ་པ་ཡིན་པའི་རྒྱུ་མཚན་ནི། འདིའི་སྐབས་སུ་དཔོན་ཆེན་རྒྱལ་བ་བཟང་པོ་པ་དེ་ཉིད་འབྲོག་ཁྲི་སྐོར་གྱི་རུ་ཐོག་མཚོ་མོ་རུ་ཁྱུང་གིས་བསྐོར་བ་སྒར་ཆེན་བཞུགས་དུས་ཆིབས་གར་བ་སྟོན་ཆེན་བྱ་བ་ཞིག་བོར་ནས་ལྷ་འདྲེ་མི་གསུམ་ལ་བཅའ་ཧུ་བཀྲམ་རྩད་གཅོད་པ་ཕྱོགས་བཞིར་བཏང་བས། ཤར་ཕྱོགས་པའི་མི་གཉིས་ཀྱིས་ཁ་བ་སྐྱ་སིབ་བབས་པའི་སྟེང་ལ་རྟ་རྗེས་འདུག་པ་མཐར་དེད་པས་ཤར་སོག་ལ་སྐྱ་མོའི་ཞོལ་ན་སྒར་ཆེན་ཞིག་འདུག་པ་དེ་ཁྲོད་ན་ཆིབས་པ་ཡང་འདུག་ནས་མགྲོན་གཉེར་ལ་རྒྱུ་མཚན་བསྙད་སྒར་འདི་སུའི་ཡིན་དྲིས་པས་སྒར་འདི་མ་སངས་ཀྱི་སྒར་ཡིན། གེ་སར་དང་སྒུ་ལྡི་ལ་སོགས་ཡོད་ཟེར་གུར་ནང་དུ་ཁྲིད་་སྒུ་ལྡི་ཡིན་ཟེར་བ་དེ་ན་རེ། ངེད་ཀྱིས་ཁ་སིང་ནས་བྱང་སྟོང་ས་ལ་ཡོངས་དཔོན་ཆེན་པ་དང་མཇལ་རྩིས་ལ་མ་ཕྲད། ད་བཟོད་ཁྱེད་ཀྱི་དཔོན་པོ་ཞིག་ཡོད་པ་དེ་དང་ཡང་ཡང་ཕྲད་ཟེར་བ་གྱིས་ལ། རྟ་དང་མདའ་རྒོད་སྒྲོ་མ་འདི་ཕུལ་ཟེར་ནས་ཁྱེར་ཡོངས། དབོན་