[A:༤༣༨] །གྲུབ་པའི་སྐྱེ་བོ་དག་དང་ལྷན་ཅིག་སྤེལ་བར་གྱུར་པའི་རིག་འཛིན་འདི་དག་རྣམས། །ཙན་དན་གྲིབ་བསིལ་དག་ལ་དགའ་མའི་འཐུང་ལྷག་ཏུ་གྱུར་ཆང་དག་འཐུང་བར་བྱེད། །ཅེས་སྐྱེ་བོ་རྣམས་གོས་རྒྱན་བཟང་པོ་དང་ཆང་གིས་མྱོས་པས་གླུ་གར་རྩེད་འཇོ་ཇི་སྙེད་བྱེད་ལ། དེ་ཡང་མདོ་རྒྱ་ཆེར་རོལ་པ་ལས། དགེ་སློང་དེ་ལྟར་བྱང་ཆུབ་སེམས་དཔའ་དགའ་ལྡན་གྱི་གནས་དམ་པ་ན་འདུག་པ་ནི་རྣམ་པར་ལྟ་བ་ཆེན་པོ་བཞི་ལ་རྣམ་པར་བལྟ་སྟེ། བཞི་གང་ཞེ་ན་འདི་ལྟ་སྟེ། དུས་ལ་རྣམ་པར་ལྟ་བ་དང༌། གླིང་ལ་རྣམ་པར་ལྟ་བ་དང༌། ཡུལ་ལ་རྣམ་པར་ལྟ་བ་དང༌། རིགས་ལ་རྣམ་པར་ལྟ་བའོ་ཞེས་པའི་རིགས་ལ་ལྟ་ཚུལ། མཁའ་འགྲོ་རྒྱ་མཚོ་ལས། འཛམ་བུའི་གླིང་ནི་ཆུང་ངུ་འདིར། །བདག་ནི་ཤཱཀྱའི་རིགས་རྗེས་འགྲོ། །ཞེས་ཉི་མའི་གཉེན་གྱི་བརྒྱུད་རྒྱལ་པོ་ཟས་གཙང་མའི་རིག་ཕུན་སུམ་ཚོགས་པ་ལ་གཟིགས་པ་ལྟར་དམ་པ་འདི་ཉིད་ཀྱི་རིགས་ནི་བོད་འདིར་རུས་ཆེན་བཞིར་གྱེས་པའི་ནང་ཚན་རྨུ་ལྡོང་སྟོད་མི་ཉག་སྟེ་བཞི་ལས་ལྡོང་གི་རིགས་སུ་གཏོགས་པ། དེ་ཡང་ཡིག་ཚང་མཁས་པ་དགའ་བྱེད་ལས། །འགྲོ་བའི་གཙུག་རྒྱན་དཔལ་ལྡན་ས་སྐྱ་པས། །ཆོལ་ཁ་གསུམ་ལ་ཁ་ལོ་སྒྱུར་བའི་དུས། །དེ་ཡི་འཕྲིན་ལས་སྒྲུབ་པའི་དཔོན་ཆེན་དང༌། །སློབ་དཔོན་དགེ་བཤེས་བློན་ཆེན་རིམ་པ་རྣམས། །མཁས་མཆོག་སྟོབས་ལྡན་གྲངས་ལས་འདས་མོད་ཀྱི། །ཐོག་མར་ལུས་པོ་ཆེ་ཡི་མི་གསུམ་པོ། །གྲུམ་པ་ས་སྐྱའི་དཔོན་ཆེན་ཤཱཀ་བཟང་དང༌། །ཤར་སྨད་བཙོང་ཁའི་དགེ་བཤེས་རིན་བརྩོན་དང༌། །མདོ་སྟོད་གོན་གྱོའི་ཧོར་ཆེ་སྟོན་ཚུལ་ཡིན། །དེ་གསུམ་ནང་ནས་རིགས་མཐོ་བློ་གཙང་བ། །དགེ་བཤེས་ཆེན་པོ་ནས་བརྒྱུད་དེང་