[A:438] /grub pa'i skye bo dag dang lhan cig spel bar gyur pa'i rig 'dzin 'di dag rnams/ /tsan dan grib bsil dag la dga' ma'i 'thung lhag tu gyur chang dag 'thung bar byed/ /ces skye bo rnams gos rgyan bzang po dang chang gis myos pas glu gar rtsed 'jo ji snyed byed la/ de yang mdo rgya cher rol pa las/ dge slong de ltar byang chub sems dpa' dga' ldan gyi gnas dam pa na 'dug pa ni rnam par lta ba chen po bzhi la rnam par blta ste/ bzhi gang zhe na 'di lta ste/ dus la rnam par lta ba dang / gling la rnam par lta ba dang / yul la rnam par lta ba dang / rigs la rnam par lta ba'o zhes pa'i rigs la lta tshul/ mkha' 'gro rgya mtsho las/ 'dzam bu'i gling ni chung ngu 'dir/ /bdag ni shAkya'i rigs rjes 'gro/ /zhes nyi ma'i gnyen gyi brgyud rgyal po zas gtsang ma'i rig phun sum tshogs pa la gzigs pa ltar dam pa 'di nyid kyi rigs ni bod 'dir rus chen bzhir gyes pa'i nang tshan rmu ldong stod mi nyag ste bzhi las ldong gi rigs su gtogs pa/ de yang yig tshang mkhas pa dga' byed las/ /'gro ba'i gtsug rgyan dpal ldan sa skya pas/ /chol kha gsum la kha lo sgyur ba'i dus/ /de yi 'phrin las sgrub pa'i dpon chen dang / /slob dpon dge bshes blon chen rim pa rnams/ /mkhas mchog stobs ldan grangs las 'das mod kyi/ /thog mar lus po che yi mi gsum po/ /grum pa sa skya'i dpon chen shAka bzang dang / /shar smad btsong kha'i dge bshes rin brtson dang / /mdo stod gon gyo'i hor che ston tshul yin/ /de gsum nang nas rigs mtho blo gtsang ba/ /dge bshes chen po nas brgyud deng