[A:༦༣༢]དུ་སྤྱན་དྲངས་པའི་ཡེ་ཤེས་ཕྱིར་འབྲང་གི་བགེགས་སྐྲོད་འཇམ་དཔལ་ཞལ་དགུ་པར་ལངས་ཏེ་བྱས་པས་བདུད་རིགས་ཀྱི་ཚོགས་ཐམས་ཅད་བྱེར་ཞིང་དེར་ཚོགས་པ་ཀུན་ཀྱང་སྤུ་ཟིང་བྱེད་པ་མང་དག་བྱུང་འདུག །མཆོད་སྟེགས་སུ་ཕེབས་པ་དང་མཆོད་པ་དང་སྐུ་ཁྲུས་འབུལ་བ་སོགས་རྒྱས་པར་བྱས། པཉྩ་ལི་ཀ་སྣམ་སྦྱར་གྱི་གྲྭ་སྦུབས་ནས་གཉིས་མེད་ཀྱི་ཡེ་ཤེས་ལ་ཁ་དོག་མེད་ཀྱང་བདུད་རྩི་ཤེལ་དཀར་གྱི་གོང་བུ་གཅིག་ཏུ་བྱས་པ་ཚུལ་ཁྲིམས་ཀྱི་ཕུང་པོ་གོང་འཕེལ་དང་དྲི་བསུང་ཕྱོགས་བཅུར་འཕྲོ་བའི་སྤོས་དཀར་གྱི་རྡོག་མ་བདག་གི་པང་དུ་གནང་བྱུང་བས་སྒྲིབ་མེད་ཡེ་ཤེས་ཀྱི་ཐུགས་རྗེ་རྒྱུན་ཆད་མི་མངའ་ལགས་སོ། །དེ་ལྟར་རྒྱུ་རིན་པོ་ཆེ་གསེར་ལས་གྲུབ་པའི་གནོད་སྦྱིན་ཕོ་མོའི་འཁོར་ལོ་སྒྲུབ་པ་ཟླ་བ་ཙམ་བྱས་རྒྱུད་ནས་ཇི་སྐད་བཤད་པ་ལྟར་བཞུགས་སུ་གསོལ། མཐར་རབ་ཏུ་གནས་པ་རྒྱུད་སྡེ་ནས་གསུངས་པ་ལྟར་མཚན་ཉིད་ཚང་བའི་སྒོ་ནས་ཞག་གསུམ་སྦྲེལ་ཞིག་བྱས། སྒྲུབ་པོ་སྦྱིན་བདག་དང་བཅས་པའི་ཚེ་དང་བསོད་ནམས་དཔལ་འབྱོར་གྱི་རྒྱུན་ཐམས་ཅད་གོང་འཕེལ་དུ་འགྲོ་བའི་ཕྱིར་རྒྱས་པའི་སྦྱིན་སྲེག་ཐུན་མོང་མིན་པའི་ཕྱག་ལེན་གྱིས་བརྒྱན་ནས་བྱས། ཞེས་བྱུང་ལ། གསེར་གདུང་རིན་པོ་ཆེའི་དབུ་ཐོག་ཏུ་གནམ་རྒྱན། སྙན་དར། ཏིང་ཀང་བུ་མཎྜལ་མེ་དམ་སོགས་མཆོད་རྫས་ཀྱི་རིམ་པ་རྒྱ་དཔངས་མཐོ་བ། གདུང་རྟེན་གྱི་གཡས་སུ་རྗེ་བླ་མས་བཞེང་པ་མཛད་པའི་ལམ་ཟབ་དང་གཡོན་དུ་དགོངས་རྫོགས་ལ་དམིགས་པའི་ལམ་འབྲས་བརྒྱུད་པ་དང་བཅས་པ་བླ་མ་སོ་སོའི་སྐུ་མདུན་དུ་ཞལ་དཀར། བཟེད་ཞལ། ཞལ་བསིལ། ཌཱ་དྲིལ། དབང་བུམ། འབྲུ་ཕོར། ནང་མཆོད་ཀ་ལི་སོགས་ཉེར་སྤྱད་ཕུན་སུམ་ཚོགས་པ། བསྟན་པའི་སྦྱིན་བདག་འདར་ནས་ཀྱིས་ཞིང་དང་ནས་རྩ་སྦྱར་བའི་གསེར་གདུང་རིན་པོ་ཆེའི་དྲུང་དུ་