[A:༦༢༤]མཁྱེན་པ་ཀླུ་སྒྲུབ་རྒྱ་མཚོ་ལ་གྲང་མོ་ཆེའི་སྤེའུ་སེར་པོར་ཆོས་དུ་མ་སྩལ་ཞིང་གསུང་འཕྲོས་ཀྱི་ལྷོངས་ལ་ད་ལོ་དྲུག་ཅུ་རྩ་ལྔའི་ཐོག་དོག་ཆ་ཆེ་བ་ཡོད་ཟེར་ཡང་མ་ཤི་ཙམ་ཡོང་ངམ་གསུང་པ་སོགས་ཀྱིས་མཚོན་ཞབས་འབྲིང་བ་དང་དྲུང་དུ་བྱུང་བ་དུ་མར་ཞིང་ཁམས་འཕོ་བའི་མདངས་ཀྱི་གསུང་མང་དུ་བྱོན་ཡང༌། བདུད་ཀྱི་མཐུས་ཀུན་དགའ་བོས་དེ་བཞིན་གཤེགས་པ་མྱ་ངན་ལས་མི་འདའ་བར་གསོལ་བ་མ་བཏབ་པ་བཞིན་བུ་སློབ་དང་ཉེ་འཁོར་བ་རྣམས་ཀྱང་གཞན་འཕྲུལ་དབང་བྱེད་ནས་རྨོངས་བྱེད་ཀྱི་མདའ་བསྣུན་པ་ལྟ་བུས་བརྟན་བཞུགས་གསོལ་འདེབས་ཀྱི་རིགས་མ་བྱུང་བ་དང༌། གཙོ་བོར་ཞིང་འདིའི་གདུལ་བྱ་ཕལ་ཆེར་རྫོགས་ཤིང་བླ་མ་དམ་པའི་བཀའ་ལྟར་དག་པ་དང་མ་དག་པའི་ཞིང་ཁམས་རྒྱ་མཚོའི་ལུས་ཅན་འདྲེན་པ་ལ་ཐུགས་ལྷག་པར་སྤྲོ་བའི་ཚུལ་གྱིས་ཟླ་བ་བདུན་པའི་ཚེས་བདུན་བརྒྱད་སྐོར་ལ་གྲིབ་ཟས་ཤིག་གིས་བསླང་བའི་སྐུ་ཁམས་མི་བདེ་བའི་ཚུལ་བསྟན་པར་གསོས་སྨན་དང་སྐུ་རིམ་སོགས་ཞབས་ཏོག་པ་རྣམས་ཀྱི་འབད་ནས་བསྒྲུབས་ཀྱང་དངས་སྐྱེད་མེད་པའི་ཚེས་བཅོ་ལྔའི་ཉིན་གཟུགས་སྐུ་མཚན་དཔེའི་དཀྱིལ་འཁོར་ཆོས་དབྱིངས་དག་པའི་ཀློང་དུ་སྡུད་པར་གཞོལ་བའི་འདའ་ཁ་མའི་ཐུགས་དམ་ཟབ་མོའི་ཏིང་ངེ་འཛིན་གྱི་ཚེ། འདར་བླ་བྲང་གི་ཚོམས་ཆེན་དུ་དགེ་འདུན་རགས་རིམ་གྱིས་རྗེ་བཙུན་རྡོ་རིང་པ་ཆེན་པོའི་སྐུ་བསྟོད་གསུང་བའི་ཚེ་སྡེངས་ཚབས་ཀྱིས་ཤློ་ཀ་གཅིག་དཀྱུས་ནས་ཆད་པ་རྗེ་བླ་མས་ཐུགས་དམ་གྱི་ངང་ནས་མཁྱེན་ཏེ་ཏིང་ངེ་འཛིན་ལས་བཞེངས་ནས་ཤློ་ཀ་འདི་ཆད་སོང་བས་བསྐྱར་ནས་ཐོན་གསུང་བ་དཔལ་མར་མེ་མཛད་ཀྱིས་སྦྲུལ་གྱི་ཤུན་པ་བརྗེས་ཀྱང་སྦྲུལ་མི་འཆི་གསུངས་པ་བཞིན་སྐྱེ་འཆི་ལ་རང་དབང་ཐོབ་པའི་གང་ཟག་གནས་ཁང་གཅིག་ནས་