[A:༦༢༥]གཅིག་ཏུ་འཕོ་བ་ཙམ་གྱི་ཉམས་ལས་མེད་པས་བློས་གཞལ་བར་དཀའ་བ་ཡིན་ནོ། །ཁ་སང་ཕན་ཆད་དཀར་ཕྱོགས་ཀྱི་ལྷ་རྣམས་མྱ་ངན་གྱིས་གདུངས་པའི་ཤུགས་ཀྱི་གནམ་ས་བར་གསུམ་གྱི་ལྟས་མི་ལེགས་པ་མང་བ་འདི་ནས་བཟུང་ནམ་མཁའ་བཻཌཱརྻ་མཐིང་ཁའི་མདོག་ལྟ་བུ་ལ་འཇའ་ཚོན་པིར་གྱིས་བྲིས་པ་ཇི་ལྟ་བར་འཁྲིགས་ཤིང་མེ་ཏོག་གི་ཆར་ཆལ་ཆིལ་དུ་འབབ་པ་སྔར་ཚོར་མ་མྱོང་བའི་དྲི་ངད་བཟང་པོས་ཁྱབ་པ་སོགས་ལྷ་རྣམས་ཀྱིས་མཆོད་པ་བསམ་གྱིས་མི་ཁྱབ་པ་སྤྲོས། ཏིང་ངེ་འཛིན་དེའི་ངང་ནས་ལམ་གྱི་འཕྲོ་རྫོགས་པར་མཛད་དེ་བཅུ་གསུམ་རྡོ་རྗེ་འཛིན་པའི་ས་མངོན་དུ་གྱུར་པས། མཁྱེན་བརྩེའི་ཞབས་ཀྱིས། ཞིང་འདིའི་མཛད་པ་ལེགས་པར་མཐར་ཕྱིན་ཚེ། །ཀུན་སྤངས་ཆེན་པོས་བྱོན་ཞེས་བསྐུལ་བའི་མཐུས། །བགྲང་ཡས་ངོ་མཚར་ལྟས་དང་ལྷན་ཅིག་ཏུ། །མཁའ་སྤྱོད་གནས་སུ་གཤེགས་ལ་གསོལ་བ་འདེབས། །ཞེས་སོ། །དེའི་ཚེ་རྗེ་མར་པ་ལོ་ཙཱ་ལ་ནཱ་རོ་ཏ་པས་པུཥྤ་ཧ་རིར་མཛད་པ་བཞིན་ཐུགས་ཀྱི་སྲས་དུ་མ་ལ་དག་པ་ཡེ་ཤེས་ཀྱི་སྐུ་དངོས་སུ་འདི་དང་ལོ་མང་སོང་ནས་ཀྱང་བསྟན་ཏེ་ཆོས་འཆད་ལུང་བསྟན་དབུགས་དབྱུང་རྒྱ་ཆེར་མཛད་པ་དཔེར་ན་འཇམ་དབྱངས་མཁྱེན་བརྩེའི་དབང་ཕྱུག་གི་གཟིགས་སྣང་ལ་མདུན་གྱི་ནམ་མཁའི་དབུས་སུ་རྡོ་རྗེ་འཆང་བློ་གསལ་རྒྱ་མཚོ། གཡས་སུ་སྤྲུལ་སྐུ་ཤཱཀྱ་ཐུབ་པ། གཡོན་དུ་ཨྱོན་ཆོས་ཀྱི་རྒྱལ་པོ་གསལ་བར་གཟིགས། རིན་པོ་ཆེ་བོད་མཁར་བས་གོ་ཡབ་ཀྱི་གདན་ས་བཞག་ནས་དབེན་པ་བསྟེན་བཞེད་པའི་དུས་ཚེས་བཅུའི་ཐོ་རེངས་ཤིག་རྗེ་བླ་མ་ཕེབས་ནས་སྤྱན་ནན་ཆེར་གཟིགས་ཏེ་གསུངས་པ་རྣམ་ཐར་དུ། ངེད་རང་ལ་སློབ་མ་ཨ་རེ་མང་ཡོད་ཀྱང་ཆོས་རྗེའི་དྲུང་དམ་ཚིག་དང་སྡོམ་