[A:༦༡༦]འཇམ་རྡོར་ཡང་སྐུ་ཚེ་རིང་པོ་མ་བྱུང་བས་བརྒྱབ་པ་འདྲ། གཏེར་ཆེན་ཆོས་ཀྱི་རྒྱལ་པོ་རཏྣ་གླིང་པའི་ལུང་བསྟན་ཆེན་མོར། ས་ཡི་ཕྱོགས་སུ་བླ་མས་སློབ་མ་བསླུ༔ ཞེས་དང༌། བྱང་ཆུབ་གླིང་པ་དཔལ་རྒྱན་གྱི་ཐུགས་གཏེར་འཁོར་འདས་རང་གྲོལ་གྱི་ཞུས་ལན་གསལ་བའི་སྒྲོན་མེ་ལས། མངའ་རིས་གདུག་པའི་དམག་འགོ་གཡོ༔ འཁོན་རིགས་ཀུན་ཞེས་བྱ་བས་འཁྲུགཿ ཁོལ་བུར་སྡུག་བསྔལ་ཅུང་ཟད་བསྐྱེད༔ ཅེས་སོགས་དོགས་པའི་གནས་མང་ཙམ་ཡོད་ཀྱང་གནས་ལུགས་ཤེས་ན་ཟོག་པོའི་མཚང་གི་དཔེ་ལྟར་སྤྲོས་པར་དགོངས་པ་ཆུང་ཞྀང་གང་ཤར་ཐམས་ཅད་ལྷ་དང་ལྷ་མོའི་རྣམ་པར་འཆར་བའི་དག་སྣང་གི་བདེན་ཁ་ཕུལ་ནས་རྩོད་པ་ཆོས་ཐོག་ཏུ་ཞི་བར་བྱེད་དོ། །དེ་ཡང་ཚོམས་ལས། ཐུབ་རྣམས་སྡིག་པ་ཆུ་ཡིས་མི་བཀྲུ་ཞིང༌། །འགྲོ་བའི་སྡུག་བསྔལ་ཕྱག་གིས་མི་སེལ་ལ། །ཉིད་ཀྱི་རྟོགས་པ་གཞན་ལ་སྤོ་མིན་ཏེ། །ཆོས་ཉིད་བདེན་པ་བསྟན་པས་གྲོལ་བར་འགྱུར། །ཞེས་འོ་སྐོལ་གྱི་སྟོན་པ་བུ་རམ་ཤིང་པས་ཀྱང་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་ནས་འགྲོ་བ་རྣམས་ཕན་བདེའི་ལམ་ལ་འགོད་པར་མཛད་པ་བཞིན། དམ་པ་འདི་ཉིད་ཀྱིས་མདོ་སྔགས་ཀྱི་ཆོས་ཚུལ་གདུལ་བྱ་སོ་སོའི་བློ་དང་འཚམ་པར་བསྟན་པས་མཆོག་རྣམས་ཀྱིས་ནི་བསྟན་པ་ཕྱོགས་བཞིར་སྐྱོང་བའི་དར་ཆེན་བཙུགས། ལ་ལ་དག་ཀློག་པ་ཐོས་བསམ་གྱི་སྒོ་ནས་འཆད་ཉན། འགའ་ཞིག་སྤོང་བ་བསམ་གཏན་གྱི་རིམ་པ་ལྷུར་ལེན་པའི་བཤད་སྒྲུབ་ཀྱི་ཆུ་རྒྱུན་རྗེ་བླ་མའི་འཕྲིན་ལས་མ་དྲོས་མཚོ་ལས་ཕྱོགས་བརྒྱར་འབབ། ས་སྐྱོང་བའི་བསྟན་པའི་སྦྱིན་བདག་སོགས་སྐྱེ་རྒུ་གྲངས་ཡས་པ་དཀོན་མཆོག་གསུམ་ལ་བླ་མར་འཛིན་ཅིང་འདི་ཕྱིའི་ལེགས་ཚོགས་སྒྲུབ་པ་ལ་སྦྱར་བའི་