[A:༦༡༤]ཐོར། མི་རྐང་འདི་ལན་གསུམ་བུས་གསུང་པ་བཞིན་བྱས་པས་དགུན་སྟོད་ཡིན་ཀྱང་གློག་འབྲུག་གི་སྒྲ་དྲག་པོ་དང་བཅས་སེར་བ་ཅོག་མོའི་སྒོ་ང་ཙམ་བབས་པས་དམག་རྣམས་སྐད་ཅིག་ལ་བྱེར། སྒར་ཐོག་ཏུ་སྲིན་བྱ་དང་འུག་པ་བབས་པའི་འཁྲུལ་གྱིས་ནད་རིམས་ཀྱིས་བཏབ་ནས་སྟོང་ལོག་ཏུ་སོང་སྟེ་གཡུལ་ལས་རྣམ་པར་རྒྱལ། དེ་དུས་གཟིགས་སྣང་ལ་མདུན་གྱི་ནམ་མཁའ་སྤྲིན་སྔོན་འཁྲིགས་པའི་སྟེང་དུ་རྗེ་བཙུན་རྡོ་རིང་པ་དེ་ཉིད་སྐུ་ལ་ཆོས་གོས་རྣམ་པ་གསུམ་གྱིས་བརྒྱན་པའི་ཕྱག་གཡས་གསེར་གྱི་རྡོ་རྗེ་ནམ་མཁའ་ལ་འཕྱར་ཞིང༌། གཡོན་པ་དངུལ་དཀར་གྱི་དྲིལ་བུ་འཁྲོལ་བ་ཡིད་ཙམ་ཁྲོས་པའི་ཉམས་དང་བཅས་སེང་གེ་དཀར་མོ་རྒྱན་གྱིས་སྤྲས་པའི་སྟེང་ན་རྒྱལ་པོ་རོལ་པའི་འདུག་སྟངས་ཀྱིས་བཞུགས་པ། དེའི་དབུ་གཙུག་གི་ཐད་དུ་བདག་ཆེན་རྡོ་རྗེ་འཆང་ཡན་གྱི་གསུང་ངག་བླ་མ་བརྒྱུད་པ་ཡོངས་རྫོགས། དེའི་གཡས་གཡོན་དུ་ས་ར་ཧ། ཀླུ་སྒྲུབ། རྣལ་འབྱོར་དབང་ཕྱུག །ཀུ་ཀུ་རི་པ། ལོ་ཧི་པ། གཡུང་པོ་ཁྲག་འཐུང༌། དྲིལ་བུ་པ། ནཱ་རོ་ཏ་པ་བརྒྱད་པོ་ཞི་དྲག་གི་རྣམ་འགྱུར་དུ་མ་སྟོན་པ། གཞན་ཡང་ཚེ་དཔག་མེད། ཛམྦྷ་ལ། གུར་ཞལ། ལས་མཁན་དང་བཅས་པ་ཞལ་གཟིགས། དེའི་ཚེ། དཔལ་ལྡན་རྒྱལ་བ་ཀུན་གྱི་མཐུ་སྟོབས་ནི། །གཅིག་ཏུ་བསྡུས་པ་དྲིན་ཅན་ཆོས་ཀྱི་རྗེ། །ཁྱོད་ཞབས་དྲན་པའི་མོད་ལ་བདུད་དཔུང་རྣམས། །ཕྱེ་མར་འཐག་མཛད་དེ་ལ་གསོལ་བ་འདེབས། །ཞེས་སོགས་གསོལ་འདེབས་བདུད་དཔུང་ཕྱེར་འཐག་མར་གྲགས་པ་ཞལ་གཟིགས་ཇི་ལྟར་བྱུང་བ་དང་མཐུན་པ་ཐུགས་རྩོམ་གནས། གསུང་འཕྲོས་ཀྱི་ལྷོངས་སུ་བདག་ཆེན་ཀུན་དགའ་རིན་ཆེན་འདི་མ་བྱོན་ན་ས་སྐྱ་པའི་བསྟན་པ་འདི་གྲུམ་ཙེ་གུང་མེད་འདྲ་བའི་མཐའ་ཡོད་ཀྱང་