[A:༦༡༡]གསལ་བ་དང༌། ཕྱག་ལེན་ལ་དོགས་གཅོད་འདྲ་ཞུ་རྒྱུ་ཡོད་པའང་ཞུས་ཤིང་ལན་གནང་བ་ཞིག་བྱུང༌། ཡང་ནུབ་ཅིག་ཕ་བླ་མ་བཞུགས་ཁྲི་ཐོག་རྩར་སྙོགས་པ་ཞིག་གི་སྟེང་ན་བེར་ཐུལ་ནེ་ཙོ་ཁ་གསར་པ་ཞིག་བཞེས་ནས་བཞུགས་པའི་སྐུ་ཞབས་གཡོན་ན་བདག་འདུག་པ་ལ་ཨ་སྐྱབས་ཀྱིས་གསོལ་ཇ་ཞུས་རྗེས་གསོལ་ཁ་ཞུ་ཡི་འདུག་པས་ངའི་དེ་ཁོང་ལ་དྲོངས་གསུངས་གསོལ་ཁ་དེ་བདག་ལ་དྲངས་པ་ཞིག་རྨིས། ཡང་ནུབ་ཅིག་དབུ་རྩེ་འོག་འདྲ་བ་ཞིག་ན་ཁྲི་སྔར་གྱི་དེ་ལས་མཐོ་བ་འདྲ་བ་ཞིག་ལ་བཞུགས་ཚེ་འཁྲིད་ཀྱི་ཚར་ཆོས་དེ་གསུང་རྒྱུ་ཡིན་སྙམ་པ་བྱས་བདག་སྐུ་མདུན་ན་འདུག་པ་ལ་གསུང་ཆོས་ཧ་ཅང་གསལ་བ་ནི་མ་བྱུང་རླུང་བུམ་ཅན་བཟུང་སྤྱན་ལྟ་སྟངས་མཛད་ཧར་རེ་བཞུགས་པ་གསལ་པོ་ཞིག་རྨིས། ཡང་ནུབ་ཅིག་བོ་དོང་རྫོང་གི་བདེ་བ་ཅན་ཡིན་སྙམ་པ་ཞིག་ན་བཞུགས་གདན་མཐོན་པོ་ཞིག་ལ་རྡོ་རྗེ་འཆང་སྒོ་རུམ་པ་ཆེན་པོ་བཞུགས་དེའི་སྐུ་གཞོགས་གཡོན་ན་བདག །བདག་གི་གཡོན་ན་རྗེ་བཙུན་དབོན་བཞུགས་པ་རྗེ་རིན་པོ་ཆེས་གཞིས་ལེན་མཛད་རྒྱུ་བའི་སྟོན་གཤོམ་བཟང་པོ་བྱས་པ་ཞིག་རྨིས་ཞེས་བྱུང༌། ཞ་ལུར་བཞུགས་སྐབས་འོད་གསལ་དུ་རྗེ་བཙུན་རྡོ་རིང་པ་ཆེན་པོ་ན་བཟའ་སོགས་ཤིན་ཏུ་ལེགས་པའི་ངོས་མ་ཆེན་རྡོ་རྗེ་བཀྲ་ཤིས་ཕྱགས་ཕྱིར་ཁྲིད་པའི་འདར་གྱི་ཕྱོགས་སུ་ཐལ་ལེར་ཕེབས་པ་ཞིག་བྱུང་བ་ཕུགས་དེ་ཕྱོགས་སུ་སྡོད་དགོས་པ་ཡོད་པ་འདུག་ཅེས་རྗེ་ཉིད་ཀྱི་གསུང་འཕྲོས་ལས་བྱུང་བ་བཞིན་བསྟན་པའི་སྦྱིན་བདག་ཆེན་པོ་འདར་པས་འདི་ཕྱི་བར་གསུམ་གྱི་སྐྱབས་གཅིག་མགོན་གཅིག་ཞུས་པར་བརྟེན་ཕལ་ཆེར་གྲང་མོ་ཆེ་ཕྱོགས་སུ་སྟན་ཆགས། སྡེ་པའི་སྐུ་རིམ་ལ་འཇིགས་བྱེད་དྲུག་