[A:༦༠༣]བྲང་ཆེན་པོར་གསུང་ངག་རིན་པོ་ཆེ་སློབ་བཤད་ཡོངས་རྫོགས་གནང་བར་ཀུན་མཁྱེན་མཁྱེན་བརྩེས་ཁའུ་བྲག་རྫོང་པའི་བཞེད་པ་མ་ནོར་བ་གསང་ཆེན་བསྟན་པ་རྒྱས་བྱེད་ཅེས་བྱ་བ་བུམ་དབང་གི་རྨི་ལམ་ཡན་ཆད་ཀྱི་ཟིན་བྲིས་ཡིད་བཞིན་གྱི་ནོར་བུ་ལྟ་བུ་ཞིག་མཛད། ཟླ་བ་བཞི་པ་ནས་དོན་གཉེར་ཅན་དུ་མ་ལ་དཔལ་གསང་བ་འདུས་པ་མི་བསྐྱོད་རྡོ་རྗེའི་རིམ་ལྔའི་འཁྲིད་སོགས་བུ་ལུགས་ཀྱི་འཁྲིད་ཆེན་བཞི་དང་འཁྲིད་ཆུང་བཞི་རྣམས་ཀྱི་ཉམས་འཁྲིད་རིམ་བཞིན་ཆོས་ཐུན་གསུམ་དུ་བཅད་དེ་སོ་སོའི་རྒྱབ་རྟེན་གྱི་ལུང་བཅས་སྨིན་རྒྱས་དང༌། གཞན་ཡང་མདོ་སྔགས་ཀྱི་ཟབ་ཆོས་ཇི་སྙེད་ཅིག་སྩལ། དེ་ཡང་རིམ་ལྔ་གནང་གདོང་དབང་མ་ཐོབ་པ་ཁ་ཡར་བྱུང་བར་སྨིན་བྱེད་མེད་ཁ་མེད་ནས་རྗེ་བླ་མ་བཀའ་ཆོས་གཞན་གནང་བའི་ཐུགས་བྲེལ་གྱིས་གཡེངས་ནས་གནང་ལོང་མ་བྱུང་བར་ཀུན་མཁྱེན་མཁྱེན་བརྩེ་ལ་ཁྱེད་ཀྱིས་གཞན་མའི་རྒྱས་བཀབ་སོགས་འདྲེས་བསླད་མེད་པའི་བུ་སྟོན་ཐམས་ཅད་མཁྱེན་པའི་ཡིག་ཆ་སོར་བཞག་གི་དབང་ཞིག་བསྐུར་མཛོད་བཀའ་ཕེབས་པ་བཞིན་ཐུན་འཚམས་ཀྱི་དགོངས་མོ་བཞི་ཙམ་ཞིག་མར་མེ་ལ་གཟིགས་འཇུག་མཛད་དེ་རྡུལ་ཚོན་གྱི་དཀྱིལ་འཁོར་དུ་དབང་ཆ་གཉིས་གསུང་བཞིན་བསྒྲུབས། ཞ་ལུ་པའི་ཕ་ཆོས་བདེ་ཆེན་རལ་གཅིག་གི་སྨིན་གྲོལ་གཉིས་བར་ཞིག་ནས་ཡ་བྲལ་ཏེ་རྗེ་བླ་མས་གྲོལ་བྱེད་མ་གཏོགས་སྨིན་བྱེད་མ་གསན་པ་མཁྱེན་བརྩེའི་ཞབས་ཀྱིས་མཆོག་སྤྲུལ་ལེགས་ལྡན་རྡོ་རྗེར་གསན་ཞིང༌། འདི་གཉན་ཆ་ཆེ་གྲགས་ཀྱིས་མང་པོར་སྤེལ་བ་མ་མཛད་རུང་འདི་དུས་རྗེ་ཉིད་ཀྱིས་ད་ལམ་ངས་བཀའ་རྒྱ་བཀྲོལ་བ་ཡིན་པས་འཚུབ་མི་ཡོང་བསྟན་རྒྱུན་ལ་