[A:༥༨༦]ཟླ་བའི་ཟེར་གྱིས་རྣམ་པར་ཕྱེ་སྟེ་མི་འཕྲོགས་པའི་དད་པ་མཆོག་གི་ཀུནྡ་ཡོངས་སུ་བཞད་པ་ལ་བརྟེན་ལྕགས་མོ་ཕག་གི་ལོ་དཔྱིད་ཀྱི་དཔལ་མོའི་དགའ་སྟོན་དར་བའི་ཚེ་གསང་ཆེན་སློབ་བཤད་ཀྱི་སྔགས་གྲ་འདར་སྟོད་ཆོས་འཁོར་ཡང་རྩེར་མཁན་རིན་པོ་ཆེ་འཇམ་པའི་དབྱངས་བློ་གྲོས་རྣམ་རྒྱལ། ཐུགས་ཀྱི་སྲས་གནས་ལྔ་རིག་པའི་པཎྜི་ཏ་ཆེན་པོ་ཀླུ་སྒྲུབ་རྒྱ་མཚོ། རྗེ་རབ་བརྟན་པ་སོགས་སྐལ་ལྡན་གྱི་གདུལ་བྱ་ཁ་ཤས་ལ་ཚེ་གཅིག་ལ་འདུས་པ་རྣམ་གསུམ་གྱི་འཕྲང་བརྒལ་ཏེ་བཅུ་གསུམ་རྡོ་རྗེ་འཛིན་པའི་ས་ཆེན་པོར་བགྲོད་པའི་ངེས་ལམ་ཟབ་མོ་སྙན་བརྒྱུད་ཚད་མ་བཞི་དང་འབྲེལ་བའི་གསུང་ངག་རིན་པོ་ཆེ་སློབ་བཤད་ཀྱི་དབང་བྱིན་རླབས་འཁྲིད་ལུང་མན་ངག་མཐའ་དག་རྫོགས་པར་གནང༌། གསུང་རྒྱུན་ཉམས་པ་མེད་པའི་ལམ་འབྲས་ཀྱི་འཁྲིད་ཡིག་ཆེན་མོའང་ཟིན་བྲིས་མཛད་ནས་སྤྱན་ལམ་དུ་ཕབ་པས་ངའི་གསུང་ངག་སློབ་བཤད་ཀྱི་བཀའ་ཁྱེད་ལ་བབས་སློབ་མའི་ཚིལ་བུ་ལྟ་བུ་ཡིན་ཞེས་དགྱེས་རྩེར་སོན། ཞལ་སློབ་ཀྱི་ནང་ནས་ཀུན་མཁྱེན་མཁྱེན་བརྩེ་གོང་དུ་ཕུད་པའི་རྗེ་བཙུན་བོད་མཁར་བ། མཁན་ཆེན་གཞོན་ནུ་བློ་གྲོས། རྗེ་འདི་གསུམ་འགྲན་གྱི་ཟླ་མེད་དུ་མངོན་ཞིང༌། ཁྱད་པར་ཀུན་མཁྱེན་ཀླུ་སྒྲུབ་པའི་གསུང་ལས་སྐྱེས་པའི་བཤེས་གཉེན་པཎ་ཆེན་ངག་དབང་ཆོས་གྲགས། །འཇམ་དབྱངས་དགའ་བའི་བཤེས་གཉེན་སོགས་མཁས་གྲུབ་མང་དུ་བྱོན་ཞིང༌། མཁན་ངག་དབང་ཆོས་གྲགས་ནས་རྩེ་གདོང་ཁྲི་ཆེན་ཀུན་དགའ་བསོད་ནམས་ལྷུན་གྲུབ། ས་སྐྱ་ཁྲི་རིན་པོ་ཆེ། རྒྱལ་རྩེ་བདག་པོ་བྱམས་པ་ངག་དབང་བསོད་ནམས་རྒྱལ་མཚན་ཁུ་དབོན། བྱ་གཤོང་མཁན་ཆེན་མང་ཐོས་གྲགས་