[A:༥༨༠]ཆོ་འཕྲུལ་སྣ་ཚོགས་བསྟན་པའི་སྒོ་ནས་ཡིད་སྲུབས་ཀྱི་གཡུལ་ལས་རྒྱལ་བར་མཛད་པས་དེ་ནུབ་ནས་བཟུང་ཐུགས་བདེ་ཉམས་ཤིན་ཏུ་ཆེ་བར་གྱུར། ཟླ་བ་བཅུ་གཅིག་པའི་ནང་དུ་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་འདར་དུ་ཕེབས་ཞག་ཉེར་དྲུག་བཞུགས་ཐམས་ཅད་མཁྱེན་པ་རྡོ་རྗེ་གདན་པའི་ལུགས་ཀྱི་དཔལ་མགོན་སྟོབས་འཕྲོག་དབང་པོའི་གཏོར་མ། དྲག་པོའི་འཆམས་དབྱངས་ཕྱག་ལེན་ཐམས་ཅད་མཁས་པར་སྦྱོང་བདར་མཛད། ཞར་བྱུང་དུ་གུར་མགོན་གྱི་མན་ངག་མང་པོ་ཆིག་བརྒྱུད་དང་དུད་སོལ་མའི་སྐོར་དུ་མ་གནང༌། ཚར་ཆེན་ཆོས་ཀྱི་རྒྱལ་པོས་རྡོ་རྗེ་སློབ་དཔོན་དང་མཁྱེན་བརྩེའི་ཞབས་ཀྱིས་ལས་ཀྱི་རྡོ་རྗེ་མཛད་ནས་དཔོན་སློབ་རྣམས་ཀྱིས་ཉེར་དགུ་ལ་གཏོར་ཆེན་གནང་བས་བསྟན་ལ་ལོག་པར་འཁུ་བའི་གཟུགས་ཅན་གཟུགས་མེད་ཀྱི་དཔུང་ཚོགས་མཐའ་དག་ཐལ་བའི་རྡུལ་ཕྲན་བཞིན་དུ་སོང༌། དེ་ནུབ་མནལ་ལམ་དུ་རྗེ་བླ་མ་རྩེ་གདོང་ཡིན་སྙམ་པའི་ལུང་པ་ཞིག་ན་ཡར་ཕེབས་པའི་མཐར་ཁང་པ་ཞིག་འདུག་པ་དེར་བྱོན་པའི་ནང་དུ་ཤིང་ཁྲིས་བཏེག་པའི་འབོལ་གདན་ནར་མོར་བཏིང་བའི་གཡས་སུ་ཁྱབ་བདག་ཀུན་སྤངས་ཆེན་པོ་དང༌། གཡོན་དུ་ཀུན་མཁྱེན་རྡོ་རྗེ་གདན་པ་གཉིས་བཞུགས་འདུག་པར་དཔོན་སློབ་གཉིས་ལ་ཕྱག་འབུལ་དང་བྱིན་རླབས་ཞུ་བ་མཛད་ཚེ། ཐུ་ཆེན་འཇིགས་མེད་དཔའ་བོས་ཕྱག་ལེན་སོགས་བཀུར་གཟོས་མཛད་བྱུང་བར་ཀུན་སྤངས་རིན་པོ་ཆེས་ཀྱང་འདི་འདྲ་ཞིག་མཛད་ཐང་ངམ་དགོངས་པ་ཤར་བར་རྡོ་རིང་རིན་པོ་ཆེས་ཁ་ས་ང་ཚོ་ཆོས་རྗེ་གར་བྱོན་གསུང་བར་བདག་གིས་ཇོ་ནང་པའི་གྲྭ་པ་འཇམ་དབྱངས་སྒེག་པ་ཟེར་བ་གཟུགས་ཆུང་ངེ་བ་ཇོ་ཞྭ་གྱོན་པ་དེ་ལ་ཆོས་