[A:༥༨༡]འཆད་ཀྱིན་བསྡད་ཞུས་པར་རྗེ་རྡོ་རྗེ་གདན་པས་ཁྱེད་རྫུན་མ་ཟེར། འཇམ་སྒེག་དང་གནས་གསར་རྗེ་དྲུང་མི་གཅིག་གསུང་བ་ན་ཀུན་སྤངས་རྗེས་སྔོན་དང་ད་ལྟའི་ཁྱད་པར་ཙམ་ལས་གཉིས་ཀའི་གསུང་ལ་འགལ་བ་མེད། ཁོང་ཡར་ཀླུངས་པར་གྱུར་སྐབས་འཇམ་སྒེག་དང་དེང་སང་གནས་གསར་ཆོས་རྗེ་ཡིན་པས་རྒྱུད་ཅིག །དེར་མ་ཟད་ཆོས་རྗེས་བསྙེལ་ཡོད་པ་འདྲ། ཁྱེད་ཨྱོན་གྱི་ཡུལ་དུ་སྠ་བི་རར་འཁྲུངས་ནས་རྡོ་རྗེ་རྣལ་འབྱོར་མར་དབང་ཞུ་དུས་རྣམ་འབྱོར་པ་སྦྲུལ་གྱི་ག་ཤ་ཅན་དེ་ང་ཡིན། དེ་དུས་སྠ་བི་ར་པས་གདུག་པ་མང་པོ་བསྒྲལ་གསུང་པ་སོགས་བླ་མ་རྣམ་གཉིས་དྲི་བ་དྲི་ལན་གྱི་ཚུལ་མཛད་པས་འོད་གསལ་དེས་ཁྱོངས་ཤིང་མནལ་སད་པ་ན་ཐུགས་རྒྱུད་ལ་བདེ་ཆེན་གྱི་ཡེ་ཤེས་ཁྱད་པར་ཅན་དང༌། སྐུ་ཚེ་སྔོན་མའི་གནས་ཚུལ་ལ་ཐུགས་ངེས་འདྲོངས་པས་ངེད་རང་དཔོན་སློབ་་རྣམས་ཀྱིས་ཞལ་གྱི་གཏོར་ཆེན་བྱས་པར་ཀུན་སྤངས་རྗེ་དང་རྡོ་རྗེ་གདན་པ་གཉིས་དགྱེས་ཡོད་པ་འདྲ། མདང་རྨི་ལམ་འདི་འདྲ་བྱུང་ཞེས་རྗེ་མཁྱེན་བརྩེ་ལ་གསུངས་པར་ཐུགས་ལ་དགྱེས་ཚོར་དང་སྤྱན་ཆབ་འཁྲུག་པ་སོགས་བྱུང་བས། །ཀུན་མཁྱེན་མཁྱེན་བརྩེའི་རྣམ་ཐར་དུ། མནལ་ལམ་མིང་དུ་བཏགས་པའི་འོད་གསལ་ངང༌། །རྒྱལ་བ་རྡོ་རྗེ་འཆང་གཉིས་མངོན་སུམ་གཟིགས། །ལྐོག་གྱུར་སྔོན་གྱི་གནས་འགའ་ལུང་བཞིན་ཐོབ། །ངོ་མཚར་འདི་དང་འདི་འདྲ་གསུང་བ་ཐོས། །ཨ་ཧོ་སྲིད་པར་འཁྱམས་པས་ཆེས་དུབ་པ། །བདག་ལ་ཉིད་ཀྱིས་རིང་མོ་ཞིག་ནས་བསྐྱངས། །མངོན་གྱི་ཞལ་བཞེས་སླུ་མེད་བདེན་པའི་མཐུས། །འདིར་ཡང་སློབ་བཤད་སྙན་བརྒྱུད་ལྷུག་པར་སྩལ། །ད་དུང་ཁྱེད་དང་མཚུངས་