[A:༥༧༥]ཁོ་བོ་ཙམ། །ཞེས་པའི་དོན་ཐོག་ཏུ་བབས་ཤིང་རིན་ཅེན་གསེར་གྱི་མཎྜལ་སོགས་རིན་པོ་ཆེའི་རིགས་དང་ཇ་གོས་དར་གོ་ཁྲབ་ཀྱིས་གཙོས་པའི་བདོག་པ་གྱ་ནོམ་པ། མཁའ་འགྲོ་ལྔ་མཉེས་པར་བྱེད་པའི་ཚོགས་ཀྱི་འཁོར་ལོ་རྒྱ་ཆེན་པོས་སྙན་བརྒྱུད་དང་པོའི་རྟེན་འབྲེལ་ཀུན་ནས་སྒྲིག་པར་མཛད་པ་སོགས་ཀྱང༌། བསམ་འཕེལ་ནོར་འཕྲེང་ལས། ཕྱི་ནང་གསང་བའི་མན་ངག་ཞུ་བའི་ཚེ། །ཚོགས་དང་གཏོར་མས་མཁའ་འགྲོ་མཉེས་པར་བྱས། །རིན་ཅེན་གསེར་གྱི་མཎྜལ་ལན་གསུམ་ཕུལ། །གསང་ཆེན་གྲུབ་མཐའ་འཛིན་པའི་དམ་བཅའ་བྱས། །ཞེས་པས་མཚོན་ནུས། དཀར་ཆགས་དབང་སྡུད་པདྨ་རཱ་གའི་ཟ་མ་ཏོག་ལས། བསྟན་པའི་བདག་པོ་ས་སྐྱ་པའི། །གསང་ལས་ཡང་གསང་གསེར་གྱི་ཆོས། །དམར་པོ་སྐོར་གསུམ་ཞེས་གྲགས་པ། །ཞེས་རྗེ་བཙུན་ས་སྐྱ་པར་གདམས་པ་རྒྱ་མཚོ་ལྟ་བུར་བཞུགས་པའི་ནང་ནས་ཐུན་མོང་བསྒྲུབས་པས་མཆོག་ཞར་ལ་འབྱུང་བ་དམར་པོ་སྐོར་གསུམ་ཡང༌། ཇི་སྐད་དུ། ཁོ་བོས་དམ་པའི་ཞབས་པད་རིང་དུ་བ༵སྟེན། །སྙན་བརྒྱུད་བདུད་རྩིའི་ཞལ་འོང་སྙིང་ལ་ཤར། །འཁྲུལ་མེད་གདམས་པའི་གནད་ལ་ངེས་པ་ཐོབ། །གྲོགས་དག་འདི་འདྲའི་སྐལ་བཟང་ཁོ་བོ་ཙམ། །ཞེས་རྡོ་རྗེ་འཆང་འདི་ཉིད་ལ་མངའ་བའི་རྗེ་བཙུན་རིག་བྱེད་མ། ཚོགས་བདག་བགེགས་ཀྱི་རྒྱལ་པོ། ཁྲོ་བོ་འདོད་པའི་རྒྱལ་པོ་གསུམ་གྱི་ཐུན་མོང་དང་ཐུན་མོང་མ་ཡིན་པའི་རྗེས་གནང་ལུང་མན་ངག་ཕྱག་ལེན། ཞར་བྱུང་དམར་ཆུང་སྐོར་གསུམ་དང་བཅས་པ་གནང༌།