[A:༥༧༣]ས་བྲག་སྒོའི་ཐད་དུ་སྟར་སྡོང་དབོན་པོ་དང་ཕྲད་ཚེ་རྦུད་ཤར་རེ་འགྲོ་ཡང་ཆོས་རྗེའི་དྲུང་ལས་དགའ་ལྡན་ཐམས་ཅད་མཐུན་གྲུབ་པ་འདུག་གསུངས་པས་མཚོན་ཐམས་ཅད་མཁྱེན་པ་མཁྱེན་བརྩེའི་འོག་ནས་རྡོ་རྗེ་འཆང་ཚར་པ་ཆོས་རྗེའི་ཞལ་སློབ་ཀྱི་དང་མར་མངོན། འཇམ་དབྱངས་མཁྱེན་བརྩེའི་ཞབས་ཀྱིས་བཀའ་ཆོས་གནང་དགོས་ཚུལ་གྱི་ཞུ་ཡིག་ཕུལ་བར། ས་དབུས་གཙང་ཁམས་གསུམ་གྱི་སྨན་ལྗོངས་ན། ཞེས་སོགས་ཀྱི་ལན་དང་བཅས་ཞལ་གྱིས་འཆེས་པ་བཞིན་ཟླ་བ་བཅུ་གཉིས་པའི་ཚེས་བཞི་ལ་བླ་མ་དམ་པ་རྡོ་རྗེ་འཆང་བོ་དོང་དུ་ཕེབས། ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་དཔོན་སློབ་ཉུང་བསྡུས་ལ་ཟབ་ཆོས་ཇི་ལྟར་སྩལ་ན། ཁྱབ་བདག་གུར་གྱི་མགོན་པོའི་ཆོས་སྐོར་ནི། །འཕགས་པའི་ཡུལ་དུ་པཎ་གྲུབ་རྣམས་ཀྱིས་ཕྱེ། །རྒྱུད་རྒྱལ་མ་དྲོས་ཆུ་གཏེར་ལས་བྱུང་བའི། །བཀའ་བབས་རྣམ་བཞིའི་གདམས་པའི་ཆུ་རྒྱུན་ནི། །ལོ་ཙཱ་རྣམ་བཞིའི་གསུང་གི་འབབ་སྟེགས་ལས། །ལེགས་འོངས་ས་སྐྱའི་བླ་ཆེན་ཐུགས་མཚོར་འཁྱིལ། །གང་དེའི་གསུང་གི་བདུད་རྩིའི་གཟེགས་མ་ནི། །ཕྱོགས་བརྒྱར་འཕྲོས་པས་ཁ་བའི་སྨན་ལྗོངས་འདིར། །ཟབ་དོན་ལྦུ་འཕྲེང་བྱེ་བས་ཕྱུག་པ་ཡི། །རྗེས་འབྲངས་ཆུ་ཀླུང་རྣམ་བཞི་རིང་དུ་འབབ། །ཅེས་པ་ལྟར་བཀའ་བབས་བཞི་ལྡན་དུ་བཞུགས་པའི་རྡོ་རྗེ་ནག་པོ་ཆེན་པོ་གཙོ་རྐྱང༌། ལྷ་བཅུ་གསུམ་མ། ལྷ་བརྒྱད། ལྷ་བཅུ་གཉིས་མ། ལས་མཁན་རྣམས་ཀྱི་རྗེས་གནང༌། དཀྱིལ་འཁོར་དང་འབྲེལ་བའི་དབང༌། བྲག་རྫོང་དང་གསང་འཁྲིད་དང་ཐུན་མོང་མིན་པའི་ཉམས་འཁྲིད། མེ་