[A:༥༦༩]གིས་གཏོང་བའི་སྙིམ་པ་རིང་པོར་བརྐྱང་སྟེ་ཟང་ཟིང་གི་བདོག་པའི་མཆོད་སྤྲིན་རྒྱ་ཆེར་སྤྲོས། ཕྱོགས་འདུས་གཉུག་མར་གནས་པའི་དོན་གཉེར་ཅན་རྣམས་ལ་ཕ་རྒྱུད་འདུས་པ་དང་མ་རྒྱུད་འཁོར་ལོ་སྡོམ་པས་ཐོག་དྲངས་རྒྱུད་སྡེ་བཞི་དང་འབྲེལ་བའི་དབང་བྱིན་རླབས་རྗེས་གནང་རིག་གཏད་འཁྲིད་ལུང་མན་ངག་མང་དུ་གསུངས། ཁྱད་པར་གཉིས་སུ་མེད་པ་དཔལ་ཀྱེ་རྡོ་རྗེའི་མན་ངག་ལུགས་དང་འབྲེལ་བའི་ལམ་འབྲས་སློབ་བཤད་ཀྱི་དབང་འཁྲིད་ཀྱི་བྱིན་རླབས་ལུང་སོགས་འཇིགས་པ་མེད་པ་སེང་གེའི་རྒྱུད་ཀྱི་ང་རོའི་སྒྲ་དབྱངས་ཕྱོགས་བརྒྱར་བསྒྲགས་པས། མུས་པ་དཀོན་གྲགས་པ་སོགས་ཕྱོགས་ལྷུང་སྨྱོ་ཆུས་ཟིན་པའི་གླང་པོ་རྣམས་ཀྱི་དྲེགས་པའི་མགོ་བོ་བཀས་པར་གྱུར། འཇམ་དཔལ་དབྱངས་མཁྱེན་བརྩེའི་དབང་ཕྱུག་བསྙེན་རྫོགས་གནང་བའི་སྒོ་དོད་པའི་ཚེ་རྗེ་བཙུན་སྒོ་རུམ་པ་ཆེན་པོས་ལས་སློབ་ཆོས་རྗེ་ཚར་པ་འགབ་གསུང་བ་བཞིན་བོ་དོང་དུ་ལྷ་རིགས་འ་ཞྭ་རྒྱལ་པོས་གདན་དྲངས་པ་བཞིན་ཕེབས། འདུལ་བའི་གཞུང་ནས་ཇི་ལྟར་བཤད་པ་བཞིན་གྱི་ལས་སློབ་ཀྱི་བྱ་བ་གསོལ་བ་དང་བཞིའི་ལས་ཀྱི་བསྒྲུབ་བྱ་ལ་བསྙེན་རྫོགས་ཀྱི་སྡོམ་པ་བྱིན་པས་ཐམས་ཅད་མཁྱེན་པ་དགེ་སློང་རྡོ་རྗེ་འཛིན་པ་ཆེན་པོར་མངའ་གསོལ། ཀུན་མཁྱེན་མཁྱེན་བརྩེའི་ཞབས་ཀྱིས་ཐོག་དྲངས་པའི་སྣོད་ལྡན་འགའ་ཞིག་ལ་རྡོ་རྗེ་ནག་པོ་ཆེན་པོ་གུར་མགོན་གྱི་དཀྱིལ་འཁོར་ལྔའི་དབང་རྡུལ་ཚོན་ལ་བརྟེན་པ། ཕྱི་འཁྲིད་རྡོ་རྗེ་བྲག་རྫོང་དུ་གྲགས་པ་ལ་ནང་གསེས་ཀྱིས་ཕྱི་ནང་གསང་གསུམ་ཡོད་བའི་ཉམས་འཁྲིད་ཟབ་མོ་སྨིན་རྒྱས་སུ་སྩལ། རྗེ་མཁྱེན་བརྩེའི་ཐུགས་རབ་