[A:༥༦༦]གཟིམས་ཆུང་ངུ་བཞུགས་ཁྲི་མཉམ་པ་གནང་ཆོས་ཀྱི་འབེལ་གཏམ་སོགས་ཁམས་པ་གསར་རྙིང་གི་དཔེ་བཞིན་གསུང་གླེང་ཞིབ་པར་མཛད། ཇོ་ནང་ཆོས་གྲའི་དབུས་སུ་བལ་པོ་ཤིང་ཀུན་གྱི་མཆོད་རྟེན་ལ་འདྲ་དཔེ་བླངས་པ་བཞེངས་སྐབས་དང་འགྲིག །རྗེ་འདི་ཉིད་ཀྱི་ཕྱག་རྡོར་གྱི་ལི་སྐུ་ཁྱིད་གང་བ་ཞིག་ཡོད་པ་དེ་འབུལ་བ་མཛད་པ་རྗེ་བཙུན་དམ་པ་ཤིན་ཏུ་མཉེས་ནས་རྟེན་འབྲེལ་འགྲིག་ཅེས་གཟུངས་བཞུགས་ལ་འབུལ་བར་མཛད། དཔོན་སློབ་གཉིས་ཀ་རྡོར་རིང་རིན་པོ་ཆེའི་ཞལ་སློབ་རྡོ་རྗེའི་མཆེད་པོ་བླ་ན་མེད་པའི་དད་དུང་ཕུན་སུམ་ཚོགས་པར་དེ་ཕྱོགས་ཀྱི་སྐྱེ་རྒུ་རྣམས་མགྲིན་པ་གཅིག་ཏུ་གླེང༌། རིམ་གྱིས་རྨུུ་གཤོང་དང་ཐུབ་བསྟན་དགེ་འཕེལ་སོགས་སུ་ཞབས་ཟུང་བཀོད་དེ་འཆད་ཉན་སྒོམ་སྒྲུབ་ཀྱིས་མཚོན་པའི་རྣམ་དཀར་གྱི་འཕྲིན་ལས་དབྱར་མཚོ་ལྟར་འཕེལ་བཞིན་པའི་མུར། སེ་སྟོན་ཆེན་པོ་མཐུ་ཆེན་ཉི་མ་བཟང་པོ་དང་མཁས་གྲུབ་ཆེན་པོ་རིན་ཆེན་རྒྱལ་མཚན་སོགས་སྔགས་རྙིང་མའི་རིག་པ་འཛིན་པ་མང་དུ་བྱོན་པ་དང་གདུང་གཅིག་པ་སེ་དཀར་རིགས་ཀྱི་ཐིག་ལེས་སྐྱོང་བ་འདར་པ་དང༌། གྲངས་ཆེན་འདུས་ཚོགས་རྣམས་མགྲིན་གཅིག་དབྱངས་གཅིག་པའི་སྒོ་ནས་གསོལ་བ་བཏབ་པ་བཞིན་མཛེས་བྱེད་ཅེས་པ་ཆུ་མོ་ཡོས་ཀྱི་ལོ་འགོར་དགེ་འདུན་རྣམས་ཀྱིས་ཆོས་གོས་ཟླུམ་པོར་བགོ་ཞིང་མཆོད་རྫས་སྣ་ཚོགས་ཐོགས་པའི་སེར་སྦྲེང༌། སྡེ་པ་དཔོན་གཡོག་གིས་རིན་ཅེན་རྒྱན་ཆའི་སྐྱ་ཧྲགས་དང་བཅས་པས་མདུན་བསུས་ཏེ་འདར་སྟོད་ཆོས་འཁོར་ཡང་རྩེའི་སེང་གེའི་ཁྲི་ཆེན་པོར་ཞབས་ཟུང་འཁོར་ལོའི་རི་མོ་རྣམ་པར་བཀོད། ཕྱོགས་དེའི་སྐྱ་སེར་ཆེ་དགུ་མཐའ་དག་