[A:༥༦༥]ཤིན་ཏུ་འཕེལ་བར་མཛད། དཔོན་སློབ་གཉིས་ཀ་ཕྱིར་མཇལ་འཛོམ་བྱུང་རེས་ཀྱི་དཀའ་བཞི་པས། དེ་རིང་ཚར་པ་ཆོས་རྗེ་ཁོང་འབྱོན་གྱི་ཡོད་པ་འདུག་དཔལ་མགོན་ཞལ་སྔོན་མགྱོགས་སུ་བྱུང་ཚུལ་དང༌། རེས་ཆོས་རྗེ་ཚར་པ་ལ་བྱ་བ་ཁག་ཅན་ཞིག་ཡོད་པར་མཆིས་དཔལ་མགོན་ཞལ་བྲེལ་གྱིན་འདུག་གསུང་བ་ནི་མགོན་པོ་འདི་ཉིད་དཔལ་འཁོར་ལོ་སྡོམ་པ་དྲག་པོའི་སྐུར་བསྟན་པ་ཡིན་པས་དེ་འདྲའི་རིགས་གཟིགས་པ་ཐག་ཤིན་ཏུ་རིང་བས་དཔོན་སློབ་གཉིས་ཀའི་བསམ་གྱིས་མི་ཁྱབ་པའི་རྣམ་ཐར་རོ། །སང་ཉིན་ཇོ་ནང་དུ་ཕེབས་ལམ་དངོས་གཞི་དང་མི་གཅིག་པའི་བྲག་སྐྲས་ཟེར་བ་རྟ་བོང་བགྲོད་མི་ཐུབ་པའི་གཟར་པོ་དེར་དྲེའུ་ལ་ཆིབས་ཏེ་བྱོན། སྔ་འགྲོས་སོགས་མེད་ནའང་རྗེ་བཙུན་གྲོལ་མཆོག་གི་ཐུགས་མཁྱེན་གྱིས་བཅད་དེ། དེ་རིང་མགྲོན་ཆེན་ཞིག་འོང་བར་འདུག་པས་བུ་རམ་སྒོར་བ་སོགས་གཞིས་ལེན་དང་སེར་སྦྲེང་གི་སྟ་གོན་གྱིས་གསུང་བ་ལྟར་བྲག་སྐྲས་ལ་རྐང་ཐང་མ་གཏོགས་མི་ཐར་གཤིས་གཞུང་ལམ་ཕྱོགས་སུ་སེར་སྤྲེང་བསྒྲིགས་པ་ན། བྲག་ལམ་ལ་དཔོན་སློབ་འགའ་ཞིག་ཕེབས་པ་མཐོང་སྟེ་དེ་ཕྱོགས་སུ་མགྱོགས་པར་ཕྱིན། སྐྱ་སེར་མཐའ་དག་སྔར་བཞོན་པ་དང་བཅས་ཐར་པའི་དཔེ་མེད་པ་ལ་ད་ལམ་ཆོས་རྗེ་ཚར་པས་རྫུ་འཕྲུལ་བསྟན་པ་ཡིན་ཞེས་ངོ་མཚར་གྱི་གནས་སུ་གྱུར། ཕེབས་པའི་བགྲོས་མེད་པར་བསུ་བའི་བཀོད་པ་ལ་དཔོན་སློབ་རྣམས་ཐུགས་རངས་པ་དང་ཆེས་པ་ཕན་ཚུན་འགྲན་པ་བཞིན་སོང༌། འཇམ་དབྱངས་ཀུན་དགའ་གྲོལ་མཆོག་གི་ཕེབས་བསུར་བྱོན་དཔོན་སློབ་གཉིས་ཀས་མཉམ་ཕྱག་མཇལ་དར་རྩེ་སྤྲོད་