[A:༥༦༤]ངེད་ལ་ཆོས་ཉན་པར་བརྟག་པ་བྱས་པ་ཨེ་ཡིན་གསུང་བར་ངེད་རང་ཡབ་སྲས་མིན་པ་གཞན་ལ་རྒྱུས་ནི་མེད་དགོངས་པའི་ཐུགས་འཇིགས་ཞུམ་པའི་ངང་ནས་དེ་འདྲའི་སྲོལ་ཡོད་པས་བྱས་ལགས་ཞུས་པར། ལེགས་པོ་ཨེ་བྱུང་གནང་བར་ཤིན་ཏུ་བཟང་གསོལ་བ་ལ་བཞད་ཅིང་ངེད་ཀྱི་རྨི་ལམ་དུ་ཕ་རྒན་ཡིན་རྒྱུ་བ་ཞིག་གིས་གནས་གསར་བ་བརྟག་པ་འདི་བཞིན་གྲབས་འདུག་པ་ཇི་ལྟར་བྱེད་འདྲི་བར། བསྟན་པ་ལ་ཕན་ན་ཆུག་པ་དང་མི་ཕན་ན་མི་ཆུག་པ་མཛོད་ཞུས་པས་ཆུག་འདུག་པ་བསྟན་པར་ཕན་པ་ཡིན་ནམ་གསུང་བ་ན། ཐུགས་དགྱེས་པ་དང་འཇིགས་པ་ཅིག་ཅར་དུ་བྱུང༌། བཀའ་ལས། རྡོ་རྗེ་འཆང་སྒོ་རུམ་པར་བཞུགས་པ་རྣམས་ཞབས་དྲུང་དུ་གང་ཐོབ་དང་དེ་ཕྱིན་གྱི་ས་སྟོང་ངས་འགེང་གསུང་ཆོས་གྲོལ་གདོང་དཔལ་མགོན་དཀར་པོ་ཚེ་འཕེལ་གྱི་རྗེས་གནང་ཐུན་མོང་མ་ཡིན་པ་གནང༌། བླ་ལུང་དུ་འཁྲུལ་ཞིག་དཀའ་བཞི་པ་ཆེན་པོ་མཇལ་བར་དཔོན་སློབ་ཉུང་བསྡུས་ཀྱིས་ཕེབས། །དམངས་མ་ཐུགས་འགྲོས་ཆུང་ཁྱད་ནས་བལ་མདར་གཏོང་བ་གནང༌། ཟླ་བོ་རྣམས་དོ་ནུབ་ཇོ་ནང་དུ་སླེབས་པ་ཡོང་བ་ཡོད་པས་བདག་ཐོགས་གཞི་མེད་པར་ཐོན་པ་དགོས་སྙན་དུ་གསོལ་བར་དཀའ་བཞི་ནས་ཀྱིས་མངོན་པར་མཁྱེན་པས་ཁོང་རྣམས་བལ་མདའ་རང་དུ་སྡོད་པ་འདུག་དོ་ནུབ་འདིར་ཅིས་ཀྱང་བཞུགས་དགོས་གནང་བ་བཞིན་བཀའ་དང་བསྟུན་ཏེ་པདྨ་ཡང་གསང་གི་དབང་གསན་པའི་ཚེ་འཁྲུལ་ཞིག་ཆེན་པོའི་དབུའི་ཐད་དུ་དཔལ་རྟ་མགྲིན་བཞུགས་པ་དངོས་སུ་གཟིགས་ཕན་ཚུན་ཐུགས་ནང་དག་པས་བདེ་ཆེན་གྱི་ཡེ་ཤེས་ཆེན་པོའི་ངང་དུ་གསུང་སྒྲོས་དང་ཉམས་བསྡུར་སོགས་