[A:༥༦༣]འཇའ་ཚོན་བུན་བུན་འདུག་པ་མཐོང་ནས་འདི་ལྟར་འདུག་ཞུས་པས་ཅང་མི་གསུང་ནའང་རྗེས་སུ་ཐུགས་ནང་གཙང་བ་འདྲར་དེ་དུས་འཇའི་ཁྲོད་ན་ཨྱོན་ཆེན་པོ་པདྨ་འབྱུང་གནས་བཞུགས་འདུག་པ་གཟིགས་ཞེས་བཀའ་སྩལ། ཕེབས་ལམ་ཚོར་འཕྲིན་ལས་རྒྱ་ཆེར་སྐྱོང་མུ་ནས་ལྕགས་མོ་གླང་གི་ལོར་བོ་དོང་ཕུན་ཚོགས་རབ་བརྟན་དུ་རྗེ་བཙུན་རྡོ་རྗེ་འཛིན་པ་མཁན་ཆེན་སྒོ་རུམ་པ་མཇལ་བར་ཕེབས་སྐབས་ཐམས་ཅད་མཁྱེན་པ་མཁྱེན་བརྩེའི་དབང་ཕྱུག་རྗེ་འདི་ལ་ཆོས་གསན་བཞེད་ཀྱིས་ཞལ་ངོ་རྣམས་དང་བཀའ་འགྲོས་མཛད་པར། ཐུགས་དང་བསྟུན་ཆོག་པ་ཐུགས་རྩེ་མཐུན་པའི་ཁྲོལ་ཆ་མཛད་ཅིང༌། འོན་ཀྱང་ངེད་རང་ཚོའི་བྱེད་སྲོལ་བཞིན་བརྟག་པ་ཞུས་གསུང་བ་ལྟར་ཁྱབ་བདག་སྒོ་རུམ་པ་ཆེན་པོར་ཞུས་པ་ཤིན་ཏུ་བཟང་བ་བབས། ཐམས་ཅད་མཁྱེན་པས་ནན་ཞུས་མཛད་པར་བླ་མའི་སློབ་མ་སློབ་མར་མིན་གསུངས་ནས་ཞལ་གྱིས་མ་བཞེས་པའི་ཚེ། རྗེ་བཙུན་སྒོ་རུམ་པས་བླ་མའི་སློབ་མ་སློབ་མར་མིན་ཟེར་བ་བདོག་སྟེ་བླ་མ་མཉེས་བྱེད་གང་ཡིན་བྱའང་མི་གདའ་ལགས་སམ། ཅིས་ཀྱང་གནང་མཛོད་ཅེས་ནན་ཆགས་གསུང་བར་གནས་གསར་པ་མི་མིན་ཟེར་བ་བདེན་པར་འདུག །བླ་མ་ལ་ཐེལ་འབེབས་སོགས་སྔར་མེད་ཀྱི་སྲོལ་བཙུགས་གསུང་སྐུ་རྩེད་དང་བཅས་ཞལ་གྱིས་བཞེས། ཐོག་མར་སྒྲོལ་དཀར་གྱི་ཚེ་འཁྲིད་ཟླ་བའི་ཆུ་རྒྱུན་འོད་ཟེར་དྲུག་སྦྲགས་ཀྱི་རྗེས་གནང༌། ཆག་ལུགས་ཚེ་དཔག་མེད་དཀར་པོ། །དབྱངས་ཅན་མ་དཀར་མོ་སྟེ་དཀར་ལྷ་གསུམ་གྱིས་སྒོ་ཕྱེ་ནས་ཞག་དྲུག་གི་རིང་ལ་བྱིན་རླབས་རྗེས་གནང་ཉེར་དྲུག་ལུང་དུ་མ་དང་བཅས་པ་སྩལ། གསུང་གླེང་ཞིག་གི་འཕྲོས་ལ་