[A:༥༦༢]གསུངས་སོ། །གང་ཐུགས་དག་པའི་བཙུན་མོ་ལྟེ་འོག་ནང༌། །ཨ་ཤད་གཏུམ་མོ་ཡོངས་འབར་ཕྱི་རོལ་ཏུ། །ཆུ་དང་རླབས་བཞིན་སོ་སོར་གཟིགས་པའི་ཚེ། །ཉེར་བཞིའི་ཡུལ་ནས་འཚོལ་རྣམས་སྨིན་རྒྱུར་སྙེག །ཁྱབ་བདག་བླ་མའི་རྣམ་འཕྲུལ་ལེགས་བྲིས་བུ། །ཡིད་འཕྲོག་རི་བོང་འཛིན་ལྟར་དཀར་བ་གཉིས། །ཆུ་འཁུར་དབུས་ན་ཉེར་གླེང་བྱང་ཆེན་བར། །ཐང་ལྷོད་མེད་པའི་ཐུགས་རྗེའི་བརྡ་ཐབས་ཙམ། །དྭགས་བརྒྱུད་མེ་ལྷའི་མངལ་དུ་མ་བཟོད་པ། །མར་ལོའི་ཐུགས་བཅུད་ལྷ་ཆེན་དངས་མའི་ཁམས། །རྔོག་སྟོན་གངྒཱ་ལས་སྐྱུགས་མགོན་ཁྱོད་ཀྱི། །བློ་གྲོས་སྨིན་ཚལ་སྐྱེད་བསྲིངས་གདོང་དྲུག་ལྷ། །འདོད་ཁམས་དབང་མོ་བྲན་བཀོལ་མཐུ་སྟོབས་མདས། །ལོག་འདྲེན་སྙིང་ག་ཕུག་པའི་ཁྲག་དྲོན་སྐོམ། །མ་རྒྱུད་དྲེགས་ཚོགས་ཀྱིས་བཏུངས་རྐན་སྒྲ་ཡིས། །གནམ་ལྕགས་འབར་བའི་ཐོག་ཀྱང་མིང་དུ་ཟད། །གསོལ་འདེབས་ལས། དྲི་མེད་མཁའ་དབྱིངས་འཇའ་གུར་བཞད་པའི་དབུས། །ཨྱོན་མཁན་པོས་མཛེས་སྐུ་གསལ་བར་བསྟན། །འཁྲུལ་ཞིག་བླ་མའི་དབུ་གཙུག་མཁའ་ངོས་སུ། །དཔའ་བོ་རྟ་མགྲིན་གཟིགས་ལ་གསོལ་བ་འདེབས། །འདར་སྟོད་དགོན་པ་ཆོས་འཁོར་ཡང་རྩེ་ཡི། ཁྲི་ལ་ཞབས་བཀོད་སློབ་བཤད་བསྟན་པ་སྤེལ། །རྣམ་པར་རྒྱལ་བའི་ཡང་རྩེར་ཆོས་སྐྱོང་སྐུ། །བཞེངས་ཤིང་དགེ་ལེགས་མཛད་ལ་གསོལ་བ་འདེབས། །ཞེས་དབུས་ཕྱོགས་སུ་ལོ་གཉིས་ལ་ཉེ་བར་བཞུགས་ནས་ལྕགས་བྱིའི་མཇུག་གཙང་ལ་ཆིབས་ཁ་བསྒྱུར། སྟག་གྲུ་ཁའི་ཁད་ཉེར་ཕེབས་པ་ན་ནམ་མཁའ་ལ་སྤྱན་ཧུར་གྱིས་གཟིགས་ནས་ཆིབས་སྣ་འཁྲིད་མཁན་ལ་ཁྱོད་ཀྱིས་ཅི་མཐོང་གསུངས་པར་བལྟས་ཙ་ན་