[A:༥༦༠]པ་ཡིན། །ཐུབ་བསྟན་རིན་ཆེན་སྒོར་ཞུགས་ནས། །དམ་ཆོས་བདུད་རྩི་ནོས་པ་ཡི། །སྤྱིར་ནི་ཡོངས་འཛིན་བཅུ་ཕྲག་བཞི། །ཟུང་གཉིས་དག་གིས་ལྷག་པར་བཞུགས། །ཁྱད་པར་ཚེ་རབས་དཔག་མེད་ནས། །རྗེས་སུ་བཟུང་བའི་འདྲེན་པ་མཆོག །ཚེ་འདིར་རང་སེམས་ལྷན་སྐྱེས་འདི། །སྐྱེ་མེད་ཆོས་སྐུར་ངོ་སྤྲོད་ཅིང༌། །ཟབ་མོ་དབང་བཞིའི་ཆུ་བོའི་རྒྱུན། །བུམ་པ་གང་བྱོར་གནང་བ་ཡི། །བཀའ་དྲིན་མཉམ་མེད་རྡོ་རིང་པ། །འགྲན་ཟླ་ཀུན་དང་བྲལ་བ་ཡིན། །ཉམས་ལེན་གདམས་པའི་གཙོ་བོ་ནི། །རྒྱལ་ཡུམ་བདག་མེད་མཁའ་འགྲོ་ལ། །པཎ་གྲུབ་དབང་པོ་བི་རླུ་པས། །ནོས་པ་ནས་བཟུང་ད་ལྟའི་བར། །རྩ་བའི་བླ་མ་ཡན་ཆོད་དུ། །དབང་བཞིའི་ཆུ་བོ་མ་ནུབ་པའི། །བླ་མའི་གསུང་ངག་བདུད་རྩིའི་རྒྱུན། །ཚད་མ་བཞི་ལྡན་དབང་བཞིའི་ལམ། །རྡོ་རྗེ་ཐེག་པའི་སྙིང་པོ་ཡིན། །ཡང་སྙིང་ཟབ་མོ་བླ་མའི་ལམ། །རང་སེམས་བླ་མ་ཕྱག་རྒྱ་ཆེ། །ཡེངས་པ་མེད་པར་སྒོམ་པ་ཡིན། །ཕྱི་མའི་གང་འགྲོ་ད་ལྟ་མེད། །སྒྱུ་མའི་སྐྱས་ཆེན་འདེགས་པའི་ཚེ། །ཁོ་བོའི་བླ་མ་སླུ་མེད་དེ། །མདུན་གྱི་ནམ་མཁར་འབྱོན་སྙམ་ཡོད། །བདེ་ཆེན་ཐུགས་ཀྱི་དཀྱིལ་འཁོར་དང༌། །རང་སེམས་སྟོང་པ་སྤྲོས་བྲལ་གཉིས། །དབྱེར་མེད་བསྲེས་ནས་ལྷུག་པར་འཇོག །གང་ལྟར་སོང་ཡང་འགྱོད་པ་མེད། །ཅེས་གསུངས་པའི་ལྷའི་བུ་གཉིས་ཀྱང་རྗེ་བཙུན་རྡོ་རིང་པ་ཆེན་པོའི་རྣམ་སྤྲུལ་དུ་ངེས། ཡང་སྐབས་ཤིན་ཏུ་ལྷའི་བུ་གཟུགས་དང་ལང་ཚོ་ཁ་དོག་ཕུན་སུམ་ཚོགས་པ་ཞིག་གིས་རིན་པོ་ཆེའི་བུམ་པ་བདུད་རྩིས་གང་བ་ཕྱག་ཏུ་ཕུལ་བ་ལྗགས་ཐོག་ཏུ་གསོལ་བས་རོ་བརྒྱ་ཕྲག་བྲོ་བ་བྱུང་ཞིང༌། ཀླུའི་རྒྱལ་པོས་ཡིད་བཞིན་གྱི་ནོར་བུ་ཕུལ་བའི་