[A:༥༥༩]གོར་མ་ཆག་ཅིང་དེ་ནས་འཕན་ཡུལ་བྱ་བཟང་གི་རི་ཁྲོད་དུ་ཕེབས། ཐུགས་དམ་ཟབ་མོའི་ཏིང་ངེ་འཛིན་ཁོར་ཡུག་ཏུ་གནང་བའི་སྐབས་ཤིག་ནམ་མཁའ་བཻ་ཌཱུརྻ་མཐིང་གའི་མདོག་ལྟར་དངས་པའི་དབུས་ན་སྤྲིན་དཀར་ལང་ལོང་དུ་འཁྲིགས་པའི་ཁྲོད་ནས་ལྷའི་བུ་མཛེས་ཤིང་ཡིད་དུ་འོང་བ་གཉིས་བྱུང་ནས་དྲི་བ་དང༌། དེ་ལ་ལན་མཛད་པའི་སྐོར་གསུང་མགུལ་ལས་བྱུང་བ་འདི་ལྟ་སྟེ། ཨེ་མ་ཧོ། ཁ་བས་བསྐོར་བའི་སྨན་ལྗོངས་ཀྱི། །ཡུལ་དབུས་ས་ཡི་ཐིག་ལེའི་ངོས། །དབེན་པའི་རི་སུལ་ཡང་སྟེང་ན། །བླ་མ་སྒོམ་པའི་ཀུ་སུ་ལུ། །ཁྱོད་ཀྱི་ཐོག་མའི་སྐྱེ་ཡུལ་གང༌། །དམ་པའི་ཡོངས་འཛིན་སུ་ཡིས་བཟུང༌། །ད་ལྟ་ཉམས་ལེན་གདམས་ངག་གང༌། །ཕྱི་མའི་བསྟད་སོ་ཇི་ལྟར་ཡོད། །ཅེས་གླེང་བ་ལ་ཁོ་བོའི་སེམས་ལ་འདི་ལྟ་བུའི་ངོ་མཚར་བ་བར་ཆད་དམ་དངོས་གྲུབ་གང་ཡིན་ཀྱང་རུང་ལན་དྲང་པོར་བཏབ་སྙམ་ནས་འདི་ལྟར་སྨྲས་སོ། །སྟོན་དུས་བདུད་རྩིའི་འབྱུང་གནས་ལྟར། །དཀར་ཞིང་ཡིད་འཕྲོག་ཆུ་འཛིན་གསེབ། །གནས་པའི་འཆི་མེད་གཞོན་ནུ་གཉིས། །རྣ་བའི་བདུད་རྩི་སྒྲ་དབྱངས་སྙན། །ཤཱཀྱའི་བསྟན་ལ་རབ་བྱུང་ཞིང༌། །དམ་པའི་དེད་དཔོན་གྱིས་བཟུང་ཡང༌། །སྙོམ་ལས་དབང་གིས་བཅིངས་པ་ཡི། །སེར་གཟུགས་བདག་གི་སྐྱེས་པའི་ཡུལ། །གངས་རིའི་ཁྲོད་ཀྱི་གཙང་སྟོད་ཆ། །ཆུ་བོ་པཀྵུའི་ལྷོ་ཡི་ངོས། །གྲུམ་སྟོད་ས་སྐྱའི་བྱ་འདབས་ལྗོངས། །འབྲོག་མི་ལོ་ཙཱའི་གནས་ཀྱི་མདའ། །འཕྲང་གསུམ་ནང་ནས་སྲིན་འཕྲང་གདོང༌། །རྨུ་རྗེ་བཙད་པོས་བཟུང་བའི་ས། །དེར་ནི་སྔོན་གྱི་ལས་དབང་གིས། །དལ་འབྱོར་རིན་ཅེན་རྙེད་