[A:༥༥༨]པ་འདྲ་པ་ཞིག་བྱུང་གསུངས། དེ་ནས་དྲང་སྲོང་སྲིན་པོ་རིར་ཕེབས་པ་གོང་གི་དཀར་ཆག་འཕྲོས་ལས། དེ་ནུབ་ནས་ལྷ་མོ་འདི་ལ་གཏོར་མ་ཟུར་པ་རེ་བཅོས་ཆེད་དུ་འཕྲིན་ལས་དྲག་ཏུ་བཅོལ་བས་ཞག་བདུན་སོང་བའི་ནུབ་དྲང་སྲོང་སྲིན་པོ་རིར་གནས་ཚང་ཞིག་གི་ཁང་སྟེང་དུ་ལྕོག་བུ་ཕུབ་ནས་བསྡད། སྲོད་དུས་གཏོར་བསྔོས་ཀྱི་མཐར་མཆོད་གཡོག་གིས་ཁང་པའི་བད་སྟེང་དུ་ཐུན་གཏོར་ཕུལ་བའི་གཏོར་མའི་གསེབ་ནས་མེ་སྟག་མཐེབ་རྡོག་ཙམ་ཞིག་ཆད་སོང་བ་ཁོ་བོ་རང་གིས་མཐོང༌། དེ་ཇེ་ཆེར་སོང་ནས་རྫ་མ་ཙམ་དང་མཐར་ཁང་པ་ཙམ་དུ་སོང་བ་མཆོད་གཡོག་གིས་མཐོང་བ་ལ་གཞུང་གི་ཐད་དུ་བབས་སོང་ཟེར། དེ་ནས་རིང་པོར་མ་ལོན་པར་མི་ཚང་དེ་པལ་ཤི་ཆད་ཐོན་བུད་སོགས་མི་འདོད་པ་དུ་མ་བྱུང་ནས་རྗེས་སྟོངས་པ་ཞིག་བྱུང༌། བརྒྱུད་པ་འདི་ལས་འོངས་པའི་ལྷ་མོ་འདི་ལ་དྲག་ཤུལ་ནུས་མཐུ་འདི་ལྟ་བུ་ཡོད་པས་རྗེས་འབྲང་རྣམས་ཡིད་ཆེས་པར་གྱིས་ལ་ནན་ཏན་དུ་སྒྲུབ་པར་གྱིས་ཤིག །ཅེས་བཀའ་སྩལ་པ་ལྟར་རྟགས་མཚན་མངོན་དུ་གྱུར། དེ་གར་བཞུགས་མུར་སྔར་བྱུང་བའི། ཁྲག་འཛག་སྲིན་པོའི་རི་ལ་ཕྲད། །ཅེས་པའི་ལུང་བསྟན་ཐོག་ཏུ་བབས་ཏེ་ཁྲོ་ཕུར་མཇལ་བའི་བུད་མེད་འཇིགས་སུ་རུང་བ་དེ་ཇི་ལྟ་བ་ཞིག་ཞལ་གཟིགས། དེ་ནས་སྔར་གྱི་ལུང་བསྟན་ཐུགས་ངོ་འཕྲོད་དེ་མོས་གུས་ཆེན་པོས་རྩེ་གཅིག་ཏུ་གསོལ་བ་བཏབ་པས་རྗེ་བཙུན་རྡོ་རྗེ་རྣལ་འབྱོར་མའི་རྣམ་པར་གྱུར་ཏེ་དངོས་སུ་ཞལ་བསྟན། གསུང་གི་གནང་བ་སྩལ་བ་སོགས་རྗེ་བཙུན་རྡོ་རྗེ་བཙུན་མོས་མངོན་སུམ་དུ་རྗེས་སུ་བཟུང༌། རིམ་གྱིས་སྟོད་ལུང་བརྒྱུད་ར་ཚག་ཏུ་རྗེ་བཙུན་ནཱ་རོ་ཏ་པའི་ཐུགས་དམ་རྟེན་མཐོང་བས་དོན་ལྡན་མཇལ་ཚེ་གཟིགས་སྣང་ཁྱད་པར་ཅན་བྱུང་བར་